Biz azyq-túlik ónimderin barynsha qaýipsiz ári qoljetimdi etýge tyrysamyz - D.Tátiǵulova
ALMATY. 2 qyrkúıek. QazAqparat /Ádilet Musahaev/ - 1961 jyly «Tetra Pak» kompanııasy ónimdi 6 aıdan astam ýaqyt saqtaýǵa múmkindik beretin oram jasap shyqty.
Aseptıkalyq dep atalǵan bul tehnologııa búgingi tańda keńinen qoldanylyp júr. Bul jóninde Tetra pak Ortalyq Azııa kompanııasynyń marketıng jónindegi dırektory Dınara Tátiǵulova Almatyda arnaıy ótken baspasóz máslıhaty kezinde aıtty.
Aseptıkalyq tehnologııa ónimniń sapasy men dámdik qasıetterin salqyndatpaı-aq jáne eshbir konservant qospastan uzaq merzimde saqtaýǵa múmkindik beredi eken jáne azyq-túlik ónimderiniń dámi men taǵamdyq qundylyǵy saqtalatyn kórinedi. «Bul tehnologııa tutynýshylarǵa ár túrli yńǵaıly oramdar usyndy, elektr qýaty men oraý materıalyn únemdeýge múmkindik berdi. Aseptıkalyq óńdeý arqyly ónimdegi bakterııalar men oram materıalyndaǵy zııandy zattardan qorǵalady. 1989 jyly Halyqaralyq taǵam tehnologııasy ınstıtýty aseptıkalyq oramdy HH ǵasyrdaǵy taǵam ındýstrııasynyń eń mańyzdy jańalyǵy dep tanydy», -deıdi D. Tátiǵulova.
Innovatsııalyq ónimder atalǵan kompanııanyń strategııalyq baǵyttarynyń biri sanalady. Búgingi tańda álem boıynsha «Tetra Pak» kompanııasynyń 11 ǵylymı-zertteý ortalyǵy jumys isteıdi.
«Tetra Pak» kompanııasy óziniń alpys jyldyq tarıhynda álem boıynsha oram materıaldary men qaptaý qondyrǵylaryn shyǵaratyn asa iri kásiporynǵa aınaldy. Atalǵan ýaqyt ishinde kompanııa álemniń 170-ten astam elinde 79 ókildigin, oram materıaldary men qaqpaqtar shyǵaratyn 43 zaýyt, sondaı-aq, oraý avtomattaryn qurastyratyn 11 zaýytyn iske qosty. 2011 jyldyń 1-qańtarynda kompanııanyń jyldyq aınalymy 9 mıllıard 980 mıllıon eýrony qurady»,-deıdi Dınara Tátiǵulova.
«Tetra Pak» kompanııasynyń ónimi Ortalyq Azııaǵa tuńǵysh ret 1961 jyly kelgen. Kezinde Keńes Odaǵy birneshe oram avtomatyn satyp alyp, sút saqtaıtyn tetraedr oramdar shyǵarǵan. 1980-shi jyldardyń sońynda «Tetra Pak» KSRO-daǵy qyzmetin jandandyryp, Kıev qalasynda zaýyttar ashqan. Keıin, 2007 jyly «Tetra Pak» kompanııasy Máskeý oblysyndaǵy Lobnıa qalasyna qýattylyǵy asa joǵary zaýyt salady, onyń qurylysyna 100 mıllıon dollar jumsalady. 1996 jyly «Tetra Paktyń» Ortalyq Azııadaǵy enshiles kásiporny - «Tetra Pak Qazaqstan Ltd.» kásiporny ashylady. Osylaısha, aımaqta eki shtab-páter jumys isteı bastaıdy, olardyń ortalyqtary Tashkent pen Almaty qalalarynda ornalasqan.
Qazaqstan men Ortalyq Azııada «Tetra Pak» ónimderin «Coca-ColaAlmatyBottlers» JShS, «Agroprodýkt Azııa» JShS, «Fýd Master» kompanııasy AAQ, «RaıymbekBottlers» JShQ, «RG Brands» AQ, «Raıymbek Agro» JShS, «SheenLine» JShS, «Shymkent Sút» JShS, «Maslodel» JShS, «Intersok» AQ syndy uzyn-sany 100-den astam qazaqstandyq kásiporyn tutynady.
