Biz Azıada alaýynyń estafetasyn úlken maqtanyshpen, qýanyshpen qabyldap aldyq - Soltústik Qazaqstan oblysynyń ákimi Serik Bilálov
PETROPAVL. 22 qańtar. QazAqparat /Sergeı Kýznetsov/ - Keshe, 21 qańtarda Petropavlda jetinshi qysqy Azııalyq oıyndardyń Alaý estafetasy ótti.
Alaýdy alyp júrý qurmetine ıe bolǵan 60 alaýgerdiń qatarynda atqarýshy bılik organdarynyń ókilderi, qoǵam qaıratkerleri, ardagerler, sportshylar, Petropavldyń qurmetti azamattary, bilim berý, densaýlyq saqtaý, mádenıet mekemeleri men kúsh-qýat qurylymdarynyń ókilderi boldy.
Estafeta «Abylaı han ordasy» murajaı kesheniniń aldynda bastaldy. Jınalǵan qaýymnyń aldynda sóz sóılegen oblys ákimi Serik Bilálov: «biz búgin aıtýly oqıǵanyń kýási bolyp otyrmyz - bizdiń Soltústik Qazaqstan jerine VII qysqy Azııalyq oıyndardyń alaýy keldi. Qazaqstan, Azııalyq oıyndardy ótkizip otyrǵan tórtinshi el. Elbasymyzdyń halyqaralyq bedeli osynaý Azııalyq oıyndardy ótkizýde úlken ról atqaryp otyr», dep atap kórsetti.
Estafetadan keıin merekelik kontsert boldy. Onda sóılegen sózinde Serik Bilálov: «...Biz Petropavl qalasynda ótken osynaý alaý estafetasyna bir komanda bolyp qatystyq jáne elimizge júktelgen jaýapkershilikti maqtanysh, qýanysh sezimmen qabyldaımyz, Elbasyn maqtan etemiz. Osynyń bári Elbasynyń arqasynda múmkin bolyp otyr. Oblys turǵyndarynyń atynan barlyq sportshylarymyzǵa baqyt, amandyq tileımiz, laıyqtylar jeńiske jetsin. Azıada oıyndary jasasyn!» dep málim etti.
Petropavldan keıin Azıada alaýynyń estafetasyn Kókshetaý qalasy qabyldap aldy.
