Biz «Altyn belgi» ıegerleri qaýymdastyǵyn qurýǵa jan-jaqty qoldaý jasaımyz - EUÝ-dyń rektory
ASTANA. Jeltoqsannyń 29-y. QazAqparat /Arman Asqarov/ - Eýrazııa ulttyq ýnıversıteti «Altyn belgi» ıegerleriniń qaýymdastyǵyn qurý bastamasyna jan-jaqty qoldaý jasaýǵa daıar. Búgin Lev Gýmılev atyndaǵy Eýrazııa ulttyq ýnıversıtetinde bilim alyp júrgen «Altyn belgi» ıegerlerimen kezdesken osy joǵary oqý ornynyń basshysy Baqytjan Ábdiraıym osylaı aıtty,
dep habarlaıdy QazAqparat.
«Altyn belgi» ıegerleri qaýymdastyǵy» qoǵamdyq birlestigi jobasynyń avtory Ulyqbek Begimovtyń aıtýynsha, atalǵan uıym aıasynda Eýrazııa ulttyq ýnıversıtetinde oqyp jatqan barlyq «Altyn belgi» ıegerlerin biriktirip, olardyń bilim-ǵylym salasyndaǵy áleýetterin barynsha ósirý kózdelgen. «Qazirgi kezde birlestiktiń naqty jospary da bar. Onyń ishinde «Altyn belgi» ıegerleriniń ǵylymı jınaǵyn shyǵarý, «Intellektýal - 2010» jarysyn ótkizý jáne osy joǵary mártebege ıe bolǵan qazaqstandyq jastardyń arnaıy veb-portalyn ashý», - deıdi U.Begimov.
Óz kezeginde ýnıversıtet rektory Baqytjan Ábdiraıym jastardyń bul usynysyn tolyǵymen qoldaıtynyn bildirip: «Menińshe, bul uıymdy zańdy tulǵalar birlestigi retinde qurý qajet. Eýrazııa ulttyq ýnıversıteti óz tarapynan atalǵan bastamaǵa qajetti qarjylaı kómek berýge daıar», - dedi ol.
Aıta keteıik, búgingi tańda Lev Gýmılev atyndaǵy Eýrazııa ulttyq ýnıversıtetinde Qazaqstan boıynsha eń kóp «Altyn belgi» ıegerleri bilim alýda. Olardyń sany - 1266 adam.
