Biz álemde birinshi bop jumysy jeldiń baǵytyna táýelsiz agregat jasap shyqtyq - Matematıka jáne mehanıka ǵylymı zertteý ınstıtýty dırektorynyń orynbasary
ALMATY. Sáýirdiń 16-sy. QazAqparat /Erlik Erjanuly/ - Álemde birinshi bop jumysy jeldiń baǵytyna táýelsiz agregat jasap shyqqan qazaqstandyq ǵalymdar jańalyqtarynyń óndiriske engizý úshin ınvestorlar izdeıdi.
Bul keshe Almaty qalasynyń І Innovatsııalyq konventinde aıtyldy, dep habarlaıdy QazAqparat.
"Bıdare" dep atalatyn bul agregattyń avtorlary: tehnıka ǵylymynyń doktory Sh. Ershın, fızıka-matematıka ǵylymdarynyń kandıdaty T. Qonaqbaev, aǵa oqytýshy A. Tólepbergenov jáne aspırant A. Qusaıynov. Qondyrǵynyń tájirıbelik nusqasy 5-15 metr/sekýnd jelde 7kVt elektr energııasyn óndirýge múmkindik beredi.
"Ádettegi jel qondyrǵylary jeldiń baǵytyna qaraı ózgerip otyrady. Onda jeldi paıdalaný koefıtsıenti 25-30 paıyzdy quraıdy. Bizdiń qondyrǵynyń basty ereksheligi jumys isteý qyzmeti jeldiń baǵytyna táýelsiz. Sondaı-aq jeldi paıdalaný koefıtsıenti 60 paıyzdy quraıdy. Qazaqstan aýmaǵyndaǵy jeldiń ortasha jyldamdyǵy 10 metr/sekýndty quraıdy. Biz bul qondyrǵyna jasaǵan kezde bul máseleni nazardan tys qaldyrmadyq", deıdi Qazaqtyń ál-Farabı atyndaǵy ulttyq ýnıversıtetiniń janyndaǵy Matematıka jáne mehanıka ǵylymı zertteý ınstıtýty dırektorynyń orynbasaryTólegen Qonaqbaev. Onyń aıtýynsha, olardyń bul jańalyqtarymen ýnıversıtettiń 75 jyldyq mereıtoıyn atap ótý kezinde Elbasy Nursultan Nazarbaev ta tanysqan. Qazirgi tańda ǵylymı jobalar baıqaýyna qatysyp jatqan ónertapqyshtar endi aldaǵy ýaqytta qondyrǵynyń tájirıbelik serııasyn shyǵarýdy josparlap otyr. Óıtkeni jańalyq óndiriske enetin bolsa oǵan alys-jaqyn shet elderde de suranys bildirýshiler tabylmaq.
"Bıznesmender qazir kózimen kórip, qolymen ustap kórmeı jańalyqty moıyndamaıdy. Bul óz kezeginde otandyq ǵalymdarǵa úlken qıyndyq týdyryp otyr. Óıtkeni zertteý jumysynyń nátıjesi boıynsha ónertabystyń óndiristik tájirıbelik nusqalaryn jasaý úshin birshama qarajat kerek. Oǵan kez-kelgen ǵalymnyń shamasy kelmeıdi. Sondyqtan da bizdiń ǵalymdardyń ashqan ǵylymı jańalyqtary men jańa tehnologııalary osy ýaqytqa deıin kóbine-kóp qaǵaz júzinde qalyp keldi. Innovatsııalyq ekonomıkany qurý úshin memleket tarapynan járdem kerektigin jaqsy túsingendikten Elbasynyń basshylyǵymen Úkimet ony endi ǵana qolǵa alyp jatyr", deıdi fızıka-matematıka ǵylymdarynyń kandıdaty Tólegen Ospanuly.
