Bıylǵy jyly «Jetisý» keden beketiniń qyzmetkerleri ekonomıkalyq kontrabanda boıynsha 61-den astam faktini, esirtki boıynsha 5 faktini anyqtady - A. Shegılbaev
ALMATY. 27 jeltoqsan. QazAqparat /Názıra Eleýhan/ - Búgin Almatyda Halyqaralyq áýejaıy aýmaǵynda ornalasqan «Jetisý» keden beketinde BAQ ókilderi úshin keden beketiniń jumys barysymen tanystyrý maqsatynda «Jýrnalıstik desant» sharasy bolyp ótti.
Shara barysynda jýrnalısterge esirtkini, kontrabandalyq jolmen ákelingen taýarlardy, qarý-jaraq jáne valıýtany zańsyz ákelý jáne áketýdi anyqtaý úshin ornatylǵan kedendik baqylaýdyń jańa tehnıkalyq quraldary, onyń ishinde bıyl tuńǵysh ret beketke qoıylǵan «Rapiscan» jáne «ıAntar» tekserý apparattarynyń jumysy tanystyryldy. Sonymen qatar, kedendik baqylaý men kedendik rásimdeýdi júzege asyratyn bekettiń jumys barysy, bıyl alǵash ret áýejaı beketine Biryńǵaı kedendik keńistik qurylýyna oraı, Keden odaǵyna múshe elderdiń áýejolaýshylary úshin arnaıy qurylǵan dálizdiń ereksheligi, sondaı-aq, Keden zańnamasyna sáıkes, kedendik baqylaýdan ótý jáne áýe jolaýshylarynyń joljúgi men qoljúgin resimdeý aıyrmashylyqtary túsindirildi. Bunymen qatar, BAQ ókilderine qyzmettik-izdestirý ıtterdiń kómegimen esirtki jáne psıhotropty zattardy izdeý qalaı júzege asyrylatyndyǵy kórsetildi.
««Jetisý» keden beketi - Almaty qalasy Kedendik Baqylaý departamentiniń, QR keden shekarasy arqyly taýarlardy zańsyz ákelý, áketý jáne tranzıt faktilerin anyqtaý men aldyn alý sharalaryn júzege asyratyn birden- bir qurylymdyq bólimshesi bolyp tabylady. Qazirgi tańda bekette 135 qyzmetker jumys jasaıdy. Kedendik bekettiń jolaýshylar ýchaskesi tórt aýysym, ıaǵnı táýlik boıy jumys isteıdi. Áýejaı kúnine 60-qa jýyq halyqaralyq áýe reısterine qyzmet kórsetse, beket kúnine 8 myńnan astam jolaýshylarǵa kedendik baqylaý júrgizedi»,-dedi shara barysynda «Jetisý» keden beketi bastyǵynyń orynbasary Abzal Shegılbaev.
Onyń aıtýynsha, bıylǵy jyly keden beketiniń qyzmetkerleri ekonomıkalyq kontrabanda boıynsha 61-den astam faktini, esirtki boıynsha 5 faktini, kedendik tártipti buzý boıynsha 200-deı ákimshilik materıaldy anyqtap, 9 mln. teńge aıyppul óndirip alǵan. «Sondaı-aq, 700 myń AQSh dollarynan astam aqsha, 14 myń eýro jáne basqa da valıýtalardy tárkilep, jasyryn túrde túsiretin quraldardy, sary, aq metaldan jasalǵan zergerlik buıymdardy zańsyz alyp ótpek bolǵan áreketterdiń aldyn aldy», -dep atap ótti A. Shegılbaev.
Onyń aıtýynsha, Komıtet keden beketteri qyzmetkerleriniń kásibı biliktilikterin arttyrý maqsatynda arnaıy oqý-trenıngter uıymdastyryp, udaıy ótkizip keledi. «Máselen, bıyl bizdiń organ qyzmetkerleri reseılik áriptesterinen aqparat jáne tájirıbe almasý maqsatynda Máskeýde bolyp qaıtty. Onda Domodedova men Sheremeteva kedenderiniń jumys barysymen tanysty»,-dedi ol.
