Bıylǵy jyly Ulttyq qorǵa munaı túsimderi 3 trln. 447 mlrd teńge shamasynda boljanyp otyr
ASTANA. 13 qarasha. QazAqparat - Bıylǵy jyly Ulttyq qorǵa munaı túsimderi 3 trln. 447 mlrd teńge shamasynda boljanyp otyr. Bul týraly búgin Parlament Májilisiniń jalpy otyrysynda «2013-2015 jyldarǵa arnalǵan respýblıkalyq bıýdjet týraly» QR zańyna ózgerister men tolyqtyrýlar engizý týraly» zań jobasyn talqylaý barysynda málim boldy.
Ekonomıka jáne bıýdjettik josparlaý mınıstri Erbolat Dosaevtyń aıtýynsha, aǵymdaǵy jylǵa arnalǵan Ulttyq qorǵa munaı sektory uıymdarynan túsetin túsimderdiń naqtylanǵan boljamy 3 trln 447 mlrd 145 mln teńgeni quraıtyn bolady. Bul jalpy ishki ónimniń 10 paıyzy. «Ulttyq qorǵa túsetin túsimderdiń ulǵaıýy munaıǵa álemdik baǵanyń bir barrel úshin 106,3 dollarǵa ózgerýine baılanysty bolyp tabylady. Buryn bul kórsetkish júz dollar shamasynda naqtylanǵan edi. Al teńgeniń dollarǵa shaqqandaǵy baǵasy 150-den 152-ge ósýi esebinen 39 mlrd 844 myń teńge shamasynda boljanyp otyr», - deıdi E. Dosaev.
Eske sala keteıik, zań jobasynda bıýdjetke kelip túsken qosymsha tabystardy, sondaı-aq osy ýaqytqa deıin bıýdjettiń ıgerilmegen qarajattaryn qaıta bólip paıdalaný kózdeledi. Bul rette ıgerilmegen bıýdjet qarajaty negizinen iri ınvestıtsııalyq jobalarǵa qaraı baǵyttalatyn bolady. Budan bólek, Úkimettiń keńeıtilgen otyrysynda Elbasy júktegen tapsyrmaǵa sáıkes, memlekettik bıýdjettiń tapshylyǵy tómendetiledi.
