Bıylǵy jyly respýblıka teatrlarynda jańa 37 qoıylym kórsetildi
ASTANA. Jeltoqsannyń 21-i. QazAqparat /Qanat Mámetqazyuly/ - Bıylǵy jyly respýblıka teatrlarynda jańa 37 qoıylym kórsetildi. Bul týraly búgin QR Parlamenti Májilisinde ótken Úkimet saǵatynda QR Mádenıet jáne aqparat mınıstri Muhtar Qul-Muhammed málim etti,
dep habarlaıdy QazAqparat.
«Aǵymdaǵy jyly teatr ónerin damytýǵa arnalǵan kóptegen ıgilikti ister atqaryldy. Sonyń ishinde bıyldyń ózinde respýblıka teatr sahnalarynda 37 jańa qoıylymdar kórsetildi. Al burynnan kele jatqan repertýarlardy qosa eseptesek, respýblıka boıynsha aǵymdaǵy jyly 1 myńnan astam spektaklder kórsetilipti. Sonymen birge, bıyl Eýropanyń jetekshi teatrlarymen shyǵarmashylyq odaq jasaı otyryp, jańa qoıylymdar, jańa balet-opera júzege asty. Atap aıtqanda, bıylǵy jyldyń ishinde el teatrlarynda úsh jańa operanyń qoıylýy, eki jańa balettiń sahnalanýyn úlken jumys dep ataýǵa bolady», dedi jyldy qorytyndylaǵan mınıstr M. Qul-Muhammed.
Onyń aıtýynsha, otandyq teatrlardyń qoıylymyn keńeıtip, kórsetilimin baıytý maqsatynda «Táýelsizdik tolǵaýy» atty respýblıkalyq baıqaý uıymdastyrylǵan. Osy sharanyń qorytyndysy keler jyldyń basynda belgili bolmaq. Sondaı-aq, mınıstr M. Qul-Muhammed atalǵan baıqaýdy qazirdiń ózinde nátıjeli dep baǵalaýǵa bolatyndyǵyn jetkizdi. «Óıtkeni, «Táýelsizdik tolǵaýy» atty aýqymdy sharaǵa otandyq mamandarymyzdan bólek, shet elde turatyn birqatar qandastarymyz da atsalysyp otyr», dedi mınıstr.
