Bıylǵy jyly respýblıka boıynsha UBT synaqtarynan 43 túlek 125 ball aldy
ASTANA. Maýsymnyń 11-i. QazAqparat /Rýslan Ǵabbasov/ - Bıylǵy jyly respýblıka boıynsha UBT synaqtarynan 43 túlek 125 ball aldy (2009 jyly 8 túlek eń joǵary baldy jınady). Bul týraly búgin Astanada UBT nátıjeleri boıynsha ótken baspasóz máslıhatynda Bilim jáne ǵylym mınıstri Janseıit Túımebaev aıtty,
dep habarlaıdy QazAqparat.
Atap aıtqanda, 25929 mektep bitirgen túlekter 100 baldan joǵary jınady. Al 11597 túlek nátıjeni 50 balǵa jetkize almady. Mınıstrdiń sózine qaraǵanda, bıylǵy jylǵy UBT erejelerine sáıkes joǵary oqý ornynyń aqyly bólimine túsýge jáne granttaryn taǵaıyndaý konkýrsyna qatysý úshin qajetti tómengi ball sany ózgertildi. Bıylǵy jyly aqyly oqýǵa testileý nátıjeleri boıynsha 50 ball, al «Jalpy medıtsına» mamandyǵy boıynsha keminde 55 ball, onyń ishinde beıimdik páninen kem degende 7 ball, al qalǵan pánderden eń tómeni 4 ball jınaǵan talapkerler qabyldanady.
