Bıylǵy jyly Qazaqstanǵa syrttan keletin jumysshylar sany 65 myńǵa ulǵaıtyldy
ALMATY.Maýsymnyń 4-i. QazAqparat /Erbol Azanbek/- Qazaqstanda 10 myń adamnyń 700-i stýdent. Bul álemdegi eń úzdik kórsetkish, dedi búgin Almatyda ótip jatqan Qazaqstandyq IV ınvestıtsııalyq sammıt barysynda Qazaqstandyq munaı jáne gaz ınstıtýtynyń atqarýshy dırektory Jaqsybek Kúlekeev.
Onyń aıtýynsha, bul kórsetkish Eýropa elderimen salystyrǵanda eki esege joǵary. «Bul bir jaǵynan jaqsy bolsa, ekinshi jaǵynan mamandar daıyndaýda birqatar qıyndyqtar týdyryp otyr. Sheshimi tabylýy tıis máseleler kóp. Menińshe, ony Batys elderimen áriptestik pen myqty básekelestik arqyly júıeli túrde joıýǵa bolady », dedi J.Kúlekeev.
Onyń aıtýynsha, bilim salasyndaǵy ózekti máseleniń biri kásibı jumysshy mamandardy daıyndaý. «Qazirgi tańda elimiz qarqyndy damýda. Bul óz kezeginde jumysshy mamandyǵyna suranysty arttyryp otyr. Shet eldik ınvestorlar syrttan maman jumysshylar alyp kelý kvotasyn arttyrýǵa quzyrly organdarǵa jıi ótinish bildiredi. Nátıjesinde elimizde shet eldik jumysshylar sany artyp otyr. Bıylǵy jyly syrttan keletin jumysshylar sany 65 myńǵa ulǵaıtyldy», dedi J.Kúlekeev.
Qazaqstandyq munaı jáne gaz ınstıtýtynyń atqarýshy dırektory kótergen máseleniń biri - mektep bitirgen jastardyń orta arnaýly mamandyqsyz eńbekke aralasýy. «Qazaqstanda mektep túlekteriniń 20-35 paıyzy (40-75 myń adam aralyǵynda) eńbek naryǵyna eshqandaı kásibı bilimsiz, eshqandaı tájirıbesiz keledi. Sonyń saldarynan jumyssyzdar sany artyp otyr. Bul da ózekti másele. Sondyqtan orta arnaýly bilim berý salasyn jetildirý qajet. Sonymen qatar bilim berý uıymdary men iri ónerkásip oryndarynda áleýmettik áriptestik joq. Mysaly, munaıgaz jobalary boıynsha zertteý júrgizip kórgende baıqaǵanym, «Qashaǵan» men «Teńiz» jobalaryna 10-15 myń aralyǵynda jumysshy mamandar kerek. Alaıda qujat júzinde qajettilik joqtyǵy kórsetilgen. Bul áriptestik qatynastyń joqtyǵyn baıqatady», dep atap ótti J.Kúlekeev.
