Bıylǵy jyly elordada úleskerlerdiń qatysýymen salynyp jatqan turǵyn úı qurylysy, sondaı-aq mansardtyq qurylys problemalary sheshiledi - I.Tasmaǵambetov
ASTANA. Sáýirdiń 2-si. QazAqparat /Serik Sábekov/ - Bıylǵy jyly elordada úleskerlerdiń qatysýymen salynyp jatqan turǵyn úı qurylysy, sondaı-aq mansardtyq qurylys problemalary sheshiledi. Bul týraly búgin elordany odan ári damytý máseleleri boıynsha ótken keńeste Astana qalasynyń ákimi Imanǵalı Tasmaǵambetov aıtty.
I.Tasmaǵambetov 2007 jyldyń sońynda elordada 37 197 úleskerdiń, sonyń ishinde 6 922 aldanǵan úleskerdiń qatysýymen úleskerlik qurylystyń 227 nysany bolǵanyn eske saldy.
«Búgingi kúni Sizdiń tikeleı aralasýyńyzben jáne qoldaýyńyzben Astanada 166 úleskerler nysany problemalary sheshildi, olarda 27 940 adam bar. Ótken jyly 12,5 myń úlesker qatysatyn 62 nysan aıaqtaldy, onyń 3,5 myńy - aldanǵan úleskerler», - dep atap ótti ákim QR Prezıdentine qarata aıtqan sózinde.
Sondaı-aq I.Tasmaǵambetov bıyl 12 361 úlesker qatysýymen qalǵan 61 nysan aıaqtalýy josparlanyp otyrǵanyn atap kórsetti.
«ıAǵnı biz úleskerler qatysýymen turǵyn úı qurylysy problemasyn bıyl sheshýdi josparlap otyrmyz. Budan basqa 298 mansard qurylysy qatysýshylarynyń problemasy da sheshiledi», dep ýáde berdi qala basshysy.
