Bıylǵy jyly Elbasynyń tikeleı jelisine kelip túsetin suraqtar kóbirek bolady dep kútilýde - Baılanys ortalyǵy
ASTANA. Qazannyń 30-y. QazAqparat /Rýslan Ǵabbasov/ - Elimizdegi telefondandyrý deńgeıi men ınternet resýrstardyń damýy úderisin eskere otyryp, bıylǵy jyly Elbasynyń tikeleı jelisine kelip túsetin suraqtar kóbirek bolady dep kútilýde. Bul týraly búgin Astanada qarashanyń 13-i kúni Elbasy Nursultan Nazarbaevtyń tikeleı jeli arqyly qazaqstandyqtardyń saýaldaryna jaýap beretindigine baılanysty suraqtardy qabyldaý úshin qurylǵan Baılanys ortalyǵynyń basshysy Álııa Ǵalymova málim etti,
dep habarlaıdy QazAqparat.
«2007 jyly Internet konferentsııaǵa 5 myńnan astam suraq kelip tústi. Endi elimizdegi telefondandyrý deńgeıi men ınternet resýrstardyń damýy úderisin eskere otyryp, tikeleı jelige bıylǵy jyly el azamattary tarapynan joldanatyn saýaldar kóbirek bolady dep kútilýde», dedi ol.
Á. Ǵalymovanyń sózine qaraǵanda, Baılanys ortalyǵyna osy kúnderi kelip túsken ózekti ári mańyzdy saýaldarǵa Elbasy qarashanyń 13-de tikeleı efır kezinde, ıaǵnı barlyq respýblıkalyq telearnalarda jaýap beredi. Al qalǵan suraqtarǵa tıisti memlekettik organdar jaýap qaıtaratyn bolady. Jaýaptar www.line.gov.kz saıtyna ornalastyrylady.
Onyń aıtýynsha, búgin eń alǵashqy saýal Internet arqyly tańerten 7.30 kezinde, al telefon baılanysymen birinshi saýal 10.30-da kelip túsken. Suraqtar negizinen densaýlyq saqtaý, bilim jáne ǵylym, «Bolashaq» baǵdarlamasy tóńireginde, sondaı-aq «Jol kartasyn» júzege asyrý, ǵarysh salasyn damytý máselelerine qatysty.
Aıta keteıik, ortalyq táýlik boıy, al telefon jelisi tańǵy 8.00-den 23.00-ge deıin jumys isteıdi.
Esterińizge sala keteıik, baılanystyń respýblıka boıynsha biryńǵaı telefon nómiri - 555-777, sondaı-aq saýaldardy www.line.gov.kz Internet jelisi arqyly nemese vopros@akorda.kz elektrondyq poshtasyna jiberýge bolady.
Qazannyń 30-y men qarashanyń 13-i aralyǵynda jumys isteıtin Baılanys ortalyǵynda tehnıkalyq quramdy eseptegende 100-ge tarta adam qyzmet kórsetetin bolady.
