Bıylǵy jyly egiletin barlyq aýyl sharýashylyǵy daqyldarynyń aýmaǵy 21,3 mln. gektardy quraıdy

Bul týraly búgin selektorlyq rejımdegi Úkimet otyrysynda Aýyl sharýashylyǵy mınıstri Asyljan Mamytbekov málimdedi.

Onyń sózine qaraǵanda, aǵymdaǵy jylǵy egis alqaptary shamamen ótken jylǵymen sáıkes kelip tur. Atap aıtqanda, mal sharýashylyǵyn damytýǵa baılanysty mal azyǵyna negizdelgen egis alqaptary artatyn bolady. Sonymen qatar kókónis, baqsha daqyldary, maqta egisteri jáne qant qyzylshasynyń egis alqaptary ulǵaıady.

«Jazǵy astyqty 18,6 mln. gektarǵa egý josparlanyp otyr. Egin egý naýqanyna daıyndyq jumystary josparly tártipte júrgizilip jatyr»,-dedi mınıstr.

Vedomstvo basshysynyń aıtýynsha, kóktemgi egin egý naýqanynda respýblıkalyq bıýdjetten jáne «QazAgro» holdınginiń tarapynan 88,2 mlrd. teńge baǵyttalmaq. Onyń ishinde 78 mlrd. teńgesi bıýdjettik qarjy esebinen.