Bıylǵy jyly «Bolashaq» baǵdarlamasy boıynsha 67 oryn aýyl jastaryna kvota retinde usynylady

Bul týraly búgin Qazaqstan Prezıdentiniń 2010 jylǵy «Bolashaq» halyqaralyq stıpendııasyn taǵaıyndaý máselesine arnalǵan baspasóz máslıhaty barysynda QR Bilim jáne ǵylym mınıstrligi Strategııa departamenti dırektorynyń orynbasary Aqerke Abylaıhan málim etti, dep habarlaıdy QazAqparat.

«Jalpy, «Bolashaq» halyqaralyq stıpendııasyna úmitkerler arasyndaǵy aýyl jastaryna, memlekettik qyzmetshilerge, ǵylymı jáne pedagog qyzmetkerlerine kvotalar qarastyrylyp keledi. Budan bólek, aýyl jastaryna konkýrs barysynda birqatar jeńildikter de kózdeledi. Máselen, shet tilin bilý deńgeıi boıynsha qoıylatyn talap basqalarǵa qaraǵanda aýyl balalaryna tómendeý. Atap aıtqanda, kvota sheńberinde tehnıkalyq mamandyqqa baratyn, bakalavrıat boıynsha konkýrsqa qatysatyn barlyq azamattarǵa shet tilin meńgerý úshin emtıhandy 5-ke tapsyrý qajet bolsa, aýyl balalary úshin 3 alý da jetkilikti. Sonymen birge, aýyl balalary konkýrstan ótip, stıpendıant atanatyn bolsa, shet elde bir jyldyq til kýrsynan ótedi. Sodan keıin ǵana negizgi oqýyn jalǵastyrady», dedi A. Abylaıhan.

Onyń aıtýynsha, byltyrǵy 2009 jyly «Bolashaq» baǵdarlamasy boıynsha 47 adam aýyl balalaryna arnalǵan kvotaǵa ilinip, stıpendıant atanǵan. Bul barlyq stıpendıanttardyń 12 paıyzyn quraıdy. «Bıyl 1 myń 7 orynnyń 67-isi aýyl balalary úshin kvota retinde qarastyrylýda», dedi A. Abylaıhan.

Esterińizge sala keteıik, búgin, maýsymnyń 7-sinen bastap «Bolashaq» halyqaralyq stıpendııasyn taǵaıyndaý úshin qujattardy qabyldaý bastaldy. Qujattardy qabyldaý Astana jáne Almaty qalalarynda júrgiziledi. Іrikteý erejesi, basym mamandyqtar men qajetti qujattar tizbesi, úmitkerlerdiń qosymsha saýalnamalary, sondaı-aq konkýrs boıynsha qosymsha aqparat «Halyqaralyq baǵdarlamalar ortalyǵy» AQ-nyń www. edu-cip.kz resmı saıtynda ornalastyrylǵan.