Bıylǵy jyly Astana men Almatyda uıaly baılanystyń qyzmet kórsetý sapasyn arttyrý úshin 1 001 bazalyq stantsııa ornatylatyn bolady
ASTANA. 1 qazan. QazAqparat - Jyl basynan beri uıaly baılanys operatorlary Astana men Almaty qalalarynyń aýmaǵynda uıaly baılanystyń qosymsha 461 bazalyq stantsııasyn ornatty.
Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.
Uıaly baılanys operatorlary aǵymdaǵy jyldyń aıaǵyna deıin uıaly baılanystyń qosymsha taǵy da 540 bazalyq stantsııasyn ornatýdy josparlaýda. Bul jumystardy uıaly baılanys operatorlary QR KKM Baılanys jáne aqparattandyrý komıtetiniń usynysy negizinde uıaly baılanys qyzmetteriniń sapasyn arttyrý úshin atqarýda.
QR KKM Baılanys jáne aqparattandyrý komıtetiniń tóraǵasy Rızat Nurshabekov «Ótken jyly Mınıstrlik túrli standarttaǵy uıaly baılanys qyzmetiniń belgi berý parametrlerin ólsheý jáne qyzmet sapasyna tehnıkalyq baqylaý jasaý úshin arnaıy taldaǵyshtar satyp alǵan bolatyn. Olardyń kómegimen júıeniń qoljetimdiligi men belgi berýdiń úzdiksizdigin, sózdiń berilý sapasyn taldap otyrýǵa bolady», - dep atap ótti.
Qazirgi ýaqytta uıaly baılanystyń belgi berý sapasy parametrlerin ólsheý jumystary Astana jáne Almaty qalalarynyń jekelegen aýdandarynda atqarylýda. Uıaly baılanys operatorlary júrgizilgen ólsheý qorytyndylary boıynsha uıaly baılanys júıesin josparlaý jónindegi usynystaryn joldap otyrady. Keleshekte osyndaı ólsheý jumystary Qazaqstannyń basqa óńirlerinde de júrgiziletin bolady.
Aıta ketetin bir jaı, ońtaılandyrý jumystaryn atqarǵan kezde jáne qosymsha bazalyq stantsııalar ornatqan ýaqytta júıe jumysynda keıbir máseleler týyndaýy yqtımal. Aıtalyq, shaqyrýlardyń úzilip ketýi jáne júıege shyǵý múmkindigi bolmaı qalý oqıǵalary oryn alǵandyǵy ańǵarylady.
Uıaly baılanys qyzmetiniń sapasy men qoljetimdiligin arttyrý jóninde QR Kólik jáne kommýnıkatsııa mınıstrligine Memleket basshysy Astanadaǵy «EKSPO-2017» Halyqaralyq mamandandyrylǵan kórmesin uıymdastyrý jáne ótkizý máseleleri jónindegi Memlekettik komıssııanyń otyrysy barysynda tapsyrǵandyǵyn eske salamyz.
