Bıylǵy jylǵy mektep bitirýshiler úshin test tapsyrý ýaqyty jarty saǵatqa uzartylyp, oqýǵa túsý baly 50-ge deıin kóterildi - Bilim jáne ǵylym mınıstri
ALMATY. Mamyrdyń 28-i. QazAqparat /Názıra Eleýhan/ - Bıyl 2010 jyly 138 162 mektep bitirýshiniń 110 118-i ótinish bildirip, Ulttyq biryńǵaı test tapsyrady. Testileý maýsymnyń 4-10-y aralyǵynda 154 pýnkte ótkiziledi. «Altyn belgige» 3 662 túlek úmitker.
Bul týraly búgin Almatyda QR Bilim jáne ǵylym mınıstri Janseıit Túımebaev Ulttyq biryńǵaı testileýge qatysty ótkizilgen arnaıy brıfıngte málimdedi, dep habarlaıdy QazAqparat.
Onyń aıtýynsha, pýnktter 49 qala men 105 aýdan ortalyqtarynda ornalasyp, test tapsyrýshy túlekter 7 lekke bólinedi. «Bir lektegi oqýshylar 800-ge deıin azaıtyldy. Bul UBT-ny neǵurlym yńǵaıly jaǵdaıda tapsyrýǵa múmkindik beredi», dep atap ótti ol.
Ol sonymen qatar, bıyl ata-analardyń usynysymen test tapsyrý ýaqyty jarty saǵatqa uzarǵanyn aıtty. «Ótken jyldary 3 saǵat bolsa, endi testileý ýaqyty 210 mınýt, ıaǵnı 3,5 saǵat ótetin bolady. Memlekettik grant konkýrsyna qatysý úshin jáne respýblıkamyzdyń joǵarǵy oqý oryndaryna aqyly negizde oqýǵa túsý úshin kem degende 50 ball jınaýy tıis. Al, «Jalpy medıtsına» mamandyǵy boıynsha 55 ball jınaýy kerek. Ekspertter men ǵalymdardyń pikirinshe, bilim sapasyn kóterý úshin oqýǵa túsý balyn 60-qa deıin kóterý kerek», dedi mınıstr.
Brıfıng barysynda mınıstr sondaı-aq, UBT-nyń balyn attestattyń baǵasyna aýystyrý shkalasy ózgergenin aıtty. «Eger mektep bitirýshi bir pánnen 0-3 ball jınasa, «qanaǵattanarlyqsyz», al 4 jáne odan joǵary ball jınasa ońdy kórsetkish bolyp tabylady», dedi ol.
Bıyl sonymen, UBT 5 pán boıynsha, oqytý tili (qazaq nemese orys tili), Qazaqstan tarıhy, matematıka, tańdaý páni, sondaı-aq, orys tilinde oqytatyn mektepterdegi - qazaq tili, qazaq tildi mektepterdegi - orys tili pánderi boıynsha ótkiziledi. Ár pán boıynsha tapsyrmalardyń sany -25, al bes pán boıynsha barlyǵy 125 suraq usynylatyn bolady. Jyldaǵydaı, test tapsyrmalaryn baǵalaý kezinde biryńǵaı talaptardy saqtaý jáne daýly máselelerdi sheshý, UBT-ǵa qatysýshylardyń quqyqtaryn qorǵaý maqsatynda Respýblıkalyq komıssııa jáne árbir UBT-ny ótkizý pýktinde apellıatsııalyq komıssııa qurylady. Tapsyrmalardyń mazmuny jáne tehnıkalyq sebepterge baılanysty ótinishter testileýdiń qorytyndysy shyqqannan keıin kelesi kúni saǵat 13.00-ge deıin qabyldanady. Ótkizilý barysyn baqylaý úshin oblystardyń, Astana jáne Almaty qalalaryndaǵy bilim basqarmalary janynda arnaıy shtabtar qurylatyn bolady. Olardyń jumysyn QR Bilim jáne ǵylym mınıstrliginiń janyndaǵy respýblıkalyq shtab úılestiredi.
Jıyn sońynda mınıstr, bıyl da test suraqtaryna sáıkes kelmeıtin jalǵan testterdi satý arqyly aqsha taýyp júretin alaıaqtardyń aldaýyna tap bolyp qalmańyzdar dep eskertti.
