Bıylǵy jyldyń ne kókteminde ne kúzinde kezekten tys Parlament saılaýy ótýi múmkin - sarapshy pikiri
ASTANA. 7 sáýir. QazAqparat /Aıdar Ospanalıev/ - «Qazaqstannyń bıylǵy jyldyń ne kókteminde ne kúzinde kezekten tys Parlament saılaýy ótýi múmkin», -
dep esepteıdi Máskeý memlekettik ýnıversıtetiniń aqparattyq-taldaý ortalyǵynyń dırektory Alekseı Vlasov.
Bul týraly ol búgin Astanada ótken «Qazaqstandaǵy prezıdenttik saılaý: qorytyndylary jáne odan arǵy perspektıvalary» atty taqyrypta ótip jatqan eýrazııalyq jeliniń II otyrysynda bildirdi.
Ýnıversıtet qyzmetkeriniń aıtýynsha, Parlament saılaýynyń ótýi túsinikti de. Ony Qazaqstan Prezıdenti Nursultan Nazarbaev ta aıtqan bolatyn. 2007 jyly bastalǵan saıası reformany Parlamentke «Nur Otan» partııasynan ózge jańa saıası kúshterdi kirgizý arqyly sońyna deıin jetkizý kerek. «Ol qandaı jańa saıası kúshter bolmaq. Eldegi eski oppozıtsııalyq kúshter ózderiniń bılikpen básekelesýge qabilettiligin kórsete almady. Al ózge saıası kúshter, mysaly Prezıdentpen birge saılaýǵa túsken Mels Eleýsizovtiń saılaýda óz daýsyn qazirgi Prezıdentke bergendigi jónindegi málimdemesin reseılikter túsine almady. Bul, árıne Memleket basshysyna degen qurmet jáne onyń atqarǵan isterine degen rızashylyǵy bolar. Degenmen saıası básekelestik - óziniń belgili bir tártibi bar oıyn jáne osy oıynǵa qatysýshylar osy tártipti qadaǵalaı otyryp, bastaǵan isterin sońyna deıin jetkizýleri kerek. Sondyqtan M.Eleýsizovtiń saıası dodada 4-shi oryn alǵany da túsinikti. Sebebi ol ózge túgili tipti, onyń ózine daýys bergeli otyrǵan saılaýshylardyń ózin oılantyp tastady»,-dedi A.Vlasov.
Onyń pikirinshe, memlekette básekege qabiletti kúshter paıda bolýy úshin jeke ıdeıalar men jekelegen baǵdarlamalardyń paıda bolýyna qajetti jaǵdaı jasap kórgen jón. «Al burynǵydaı bir partııanyń ishinen ekinshi partııany ashyp, bireýdiń bastaǵan isin ári qara súıreı berý tıimsiz», dedi ortalyq dırektory.
