Bıylǵy jyldyń kúzinde ShYU aıasynda «Beıbit mıssııa-2010» jattyǵýlary ótedi - Qorǵanys mınıstrligi
ASTANA. Aqpannyń 18-i. QazAqparat /Rýslan Ǵabbasov/ - NATO baǵdarlamasy jelisi boıynsha kezekti «Dala qyrany» jattyǵýy sharasyn ótkizý josparlanyp otyr,
dep habarlaıdy QazAqparat.
«Búginde elimizdiń aýmaǵynda bıylǵy jyldyń kúzinde ShYU aıasynda ótetin «Beıbit mıssııa-2010» jattyǵýlaryna daıyndyq jumystary júrgizilýde. Bul bizdiń halyqaralyq áriptesterimizdiń qatysýymen ótetin eń iri aýqymdy shara bolmaq», delingen QR Qorǵanys mınıstrligi baspasóz qyzmeti taratqan málimette.
Atap aıtqanda, Ujymdyq qaýipsizdik týraly shart uıymy aıasynda «Ózara is-qımyl», sondaı-aq NATO baǵdarlamasy jelisi boıynsha «Dala qyrany» jattyǵý sharalaryn ótkizý josparlanyp otyr.
Aıta keteıik, ótken jyly Qazaqstan áskeri 52 túrli jattyǵý sharalaryn ótkizdi. Bul kórsetkish 2008 jylǵa qaraǵanda 1,5 esege artyq. Olardyń ishinde mańyzdy sanalatyn «Jaýyngerlik dostastyq», «Dala qyrany», «Áýe kúshteri» jattyǵýlary bar. Sonymen birge erekshe orynda turǵan Ujymdyq qaýipsizdik týraly shart uıymynyń jedel áreket ujymdyq kúshteriniń qatysýymen «Matybulaq» polıgonynda ótken «Ózara is-qımyl-2009» birlesken strategııalyq jattyǵýlaryn atap ótýge bolady.
Qazirgi kezde elimizde áskerlerdi basqarý úsh sala boıynsha, ıaǵnı, Qurlyqtaǵy ásker, Áýe qorǵanysy kúshteri, Áskerı-Teńiz kúshteri baǵyttarymen júzege asyrylady.
