Bıylǵy jyldyń qańtar men naýryz aralyǵynda eksport kólemi 4,2% ulǵaıdy - mınıstr
Onyń aıtýynsha, taýarlar óndirisi 5,8% ósip, kórsetiletin qyzmetter 4% azaıdy. Osynyń nátıjesinde jalpy ishki ónim 0,2% tómendegen.
«Qyzmetter salasyndaǵy bul tómendeý qabyldanǵan karantındik shekteýlermen baılanysty. Jyldyq ınflıatsııa 6,8% qurady. Óndiris sektoryndaǵy ósý óńdeý ónerkásibiniń 7%, ken óndirýdiń - 6, qurylystyń 5,5 jáne aýyl sharýashylyǵynyń 2,2% ulǵaıýy esebinen qamtamasyz etildi. Al qyzmet kórsetý sektorynda kólik qyzmetteri 11%-ke, saýda – 8,9, ákimshilik qyzmetterdi kórsetý – 4 jáne jyljymaıtyn múlikpen jasalatyn operatsııalarda – 2,7%-ke tómendedi. Bul rette baılanys qyzmetteri qańtar-sáýirde 9,6%-ke artty», - dedi mınıstr Úkimettiń qańtar-sáýir aılaryndaǵy áleýmettik-ekonomıkalyq damý qorytyndylary týraly otyrysynda.
Karantın jarııalanǵan bir ǵana sáýir aıynda ótken jylǵy sáýirmen salystyrǵanda kórsetiletin qyzmetter sektory 17,5%-ke tómendegen. Atap aıtqanda, saýda jáne kólik úshten birge, ákimshilik qyzmet kórsetý – 22,5%-ke jáne jyljymaıtyn múlik boıynsha jasalatyn operatsııalar – 9,9%-ke tómendedi. Bul tómendeý shekteýlik karantındik sharalarmen baılanysty.
«Sonymen birge, qańtar-naýryzda syrtqy saýda aınalymy 21 mlrd. dollardy qurady. Eksport 4,2% ulǵaıyp, 13,9 mlrd dollarǵa jetti. Bul rette ımport 7,1 mlrd. dollarǵa deıin tómendedi. Saýda balansynyń oń saldosy ótken jylǵy birinshi toqsanmen salystyrǵanda 9%-ke artty», - dedi R. Dálenov.
