Bıylǵy jyldyń alǵashqy toqsanynda eldegi jumyssyzdar sany 6,2 paıyzdy qurady
ASTANA. Sáýirdiń 27-si. QazAqparat /Aıdar Ospanalıev/ - 2009 jyldyń basynda eldegi jumyssyzdar sany 557,8 myń adamdy, jumyssyzdyq 6,6 paıyzdy quraǵan.
Al bıylǵy jyldyń alǵashqy toqsanynda jumyssyzdar 526,2 myń adamdy, ıaǵnı 6,2 paıyzǵa tómendegen. Bul málimetterdi búgin «Shyǵys Eýropa elderi men TMD-ǵa múshe memleketterde ınklıýzıvti rynokty damytý» atty jobasynyń tanystyrylý rásiminde Eńbek jáne halyqty áleýmettik qorǵaý mınıstrliginiń Áleýmettik áriptestik basqarmasynyń bastyǵy Alma Salyqbaev málim etti, dep habarlaıdy QazAqparat.
Onyń málimetterine qaraǵanda, aýyldyq aımaq turǵyndarynyń arasyndaǵy jumyssyzdyq 5,9 paıyzdy qurasa, jumyssyz áıelder sany 6,4 paıyzǵa, jumyssyz jastar 5,8 paıyzǵa jetken. «Aýyldaǵy jumyssyzdardyń jaıy týraly áńgime qozǵalǵan sátte bizdiń mınıstrlik BUU-nyń damý baǵdarlamasy men «Qazaqstannyń fermerler odaǵy» respýblıkalyq qoǵamdyq birlestiginiń arasynda ınklıýzıvti jobalardy damytýǵa baǵyttalǵan sharalardy júzege asyrýdy birlesip qolǵa alý jónindegi memorandýmǵa úlken úmitpen qaraıdy. Inklıýzıvti rynok - qoldanylmaı otyrǵan eńbek resýrstaryn qosa alǵanda jumyspen qamtý salasyn ıntegratsııalaýǵa múmkindik beretin tıimdi júıe», dedi basqarma bastyǵy.
