Bıylǵy jyldyń 6 aıynda respýblıka boıynsha 13 astyrtyn kazınonyń qyzmeti toqtatyldy
ASTANA. Shildeniń 15-i. QazAqparat /Rýslan Ǵabbasov/ - Zańsyz kazıno uıymdastyrý joǵary tabysty qylmystyq kásip bolyp qalyp otyr.
Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili (qarjy polıtsııasy) Murat Jumanbaı málim etti.
«Zańsyz kazıno uıymdastyrý joǵary tabysty qylmystyq kásip bolyp qalyp otyr. Búgingi kúni qylmystyń bul túri óziniń joǵary uıymdasqandyǵymen, jasyryna bilýimen jáne jańa tehnologııalardy qoldanýymen erekshelenedi. Oıynǵa qatysýǵa tek turaqty klıentterdiń atynan kelgen adamdar ǵana kirgiziledi, oıyn mekemesiniń ornalasqan jeriniń mańaıyna beıne baqylaý júıesi ornatylady»,-dedi resmı ókil.
Bıylǵy jyldyń 6 aıynda qarjy polıtsııasy organdary respýblıka boıynsha 13 astyrtyn kazınonyń qyzmetin toqtatty.
«Almaty qalasyndaǵy «Sarkand» bıznes ortalyǵynda astyrtyn kazınonyń qyzmeti áshkerelendi. Onda poker jáne rýletka oınaýǵa arnalǵan 11 oıyn stoly, 4,5 myń AQSh dollary men 500 myń teńge tabyldy. Tekserý kezinde zalda 7 oıynshy, 9 dıller, 3 daıashy, barmen jáne kúzetshi bolǵan»,- dedi M. Jumanbaı. Kazınony uıymdastyrýshy Epebekov aıyppul tóleýge jaýapkershilikke tartyldy. Tárkilengen aqshalaı qarajat memleket paıdasyna óteldi.
Sonymen qatar Aqtóbe oblysynda Shamsýtdınov bas bostandyǵynan 2 jyl shartty merzimge aıyrýǵa sottaldy. Ol astyrtyn kazınonyń qyzmetinen 17 mln.teńgeden astam zańsyz paıda tapqan.
Qaraǵandy oblysynda azamat Em múlkin tárkileý men aıyppul tóleýge jaýapqa tartyldy. Ol 600 myń teńge zańsyz paıdany kazınonyń qyzmetinen alǵan.
«Paıdakúnem kásipkerler qoldanyp jatqan jasyrý is-sharalaryna qaramastan, astyrtyn oıyn núkteleriniń qyzmeti qysqa merzimde toqtatylady. Bul iste atalmysh faktiler týraly qarjy polıtsııasyna habarlaıtyn azamattardyń úlesi az emes»,- dedi resmı ókil.
