Bıylǵy jyldyń 3 aıynda Kedendik baqylaý komıtetiniń laýazym ıelerine qatysty 17 qylmystyq is qozǵaldy
ASTANA. 12 sáýir. QazAqparat /Aıdar Ospanalıev/ - Bıylǵy jyldyń birinshi toqsanynda Qarjy mınıstrliginiń Kedendik baqylaý komıtetiniń laýazym ıelerine qatysty 17 qylmystyq is qozǵalǵan.
Olardyń 14-i nemese 82 paıyzyn keden qyzmetkerleri quqyq qorǵaý organdarymen birlese otyryp, ózderi anyqtaǵan. Bul derektermen búgin elordada jýrnalıstermen bolǵan brıfıngte Kedendik baqylaý komıteti tóraǵasynyń orynbasary Ómirzaq Beıisbekov tanystyrdy.
Onyń aıtýynsha, qazirgi tańda Kedendik baqylaý komıteti qyzmetkerleriniń uıymdastyrý, kadrlyq, saýyqtyrý baǵytynda qoldanǵan sharalarynyń arqasynda keden qyzmetkerleri tarapynan quqyq buzý jáne qylmystyq áreketter kúrt tómendegen. «Jyl basynan beri keden qyzmetkerleri tarapynan jasalǵan 13 jemqorlyq áreketteri anyqtalǵan. Olardyń 85 paıyzyn kedenshilerdiń ózderi anyqtaǵan. «Ótken jyldyń sáıkes merzimimen salystyratyn bolsaq, keden salasyndaǵy jemqorlyq áreketteri 70 paıyzǵa, qylmystyq áreketter 50 paıyzǵa kemidi»,-dedi komıtet tóraǵasynyń orynbasary.
