Bıylǵy jyldyń 11 aıynda elimizde 22 sýdıa otstavkaǵa jiberilgen
ASTANA. 24 jeltoqsan. QazAqparat /Aıdar Ospanalıev/ - Bıylǵy jyldyń 11 aıynyń málimetteri boıynsha, elimizde 22 sýdıa otstavkaǵa jiberildi.
Bul málimetterdi búgin respýblıka sottarynyń 2011 jylǵy jumysynyń qorytyndylary jónindegi keńeıtilgen keńes barysynda Joǵarǵy sot tóraǵasy Bektas Beknazarov jarııa etti.
«Bıylǵy jyly biz kadr máselesine baılanysty aýqymdy jumystar júrgizip, onyń ishinde kadrlyq ózgerister de oryn aldy. 11 aıda eldegi 22 sýdıa otstavkaǵa ketti. Sonymen qatar túrli sebepter boıynsha 59 sýdıa laýazymynan aıyryldy. Olardyń arasynda ózderiniń oryndaryn aýystyrýǵa májbúr bolǵan azamattar da jeterlik», - dedi Joǵarǵy sot tóraǵasy.
Onyń derekterinshe, respýblıka boıynsha sýdıalarǵa qoıylatyn talaptardy oryndamaǵany úshin 14 sýdıa qyzmetinen bosatyldy.
«Biz óz aramyzdy óz mindetterin talapqa saı atqara almaıtyn qyzmetkerlerden tazartýdy aldaǵy ýaqytta da jalǵastyra beretin bolamyz», - dep atap kórsetti B.Beknazarov.
Onyń málimetterinshe, eldegi sýdıa laýazymy saqtala otyryp, jergilikti sottyń sýdıasy qyzmetinen bosatylǵan azamattar - 6. «Bosaǵan oryndarǵa biz laıyqty kandıdattardy alýǵa kúsh saldyq. Batys Qazaqstan, Mańǵystaý, Aqtóbe, Atyraý oblystyq sottary tóraǵalarynyń oryndaryna jańa adamdar keldi», -dedi Joǵarǵy sot tóraǵasy.
