Bıylǵy jyldyń 10 aıynda respýblıkada 11 myńnan asa órt boldy

Onyń saldarynan 750-den astam adam zardap shegip, 329 adam qaza boldy. Tilsiz jaýdyń saldarynan kóz jumǵandardyń 41-i - balalar. Bul málimettermen búgin jýrnalıstermen bolǵan brıfıngte Tótenshe jaǵdaılar mınıstrligi baspasóz qyzmetiniń aǵa ınjeneri Lıýbov Shaposhnıkova málim etti.

Tótenshe jaǵdaılar salasynyń ókilderi jyl basynan beri 1 myń 800 adamdy qutqarǵan. Al órttiń saldarynan kelgen shyǵyn 3 mıllıard teńgeden asty. Al ótken jyldyń kórsetkishterimen salystyrǵanda órt oqıǵalarynyń sany 20 paıyzǵa, onyń saldarynan kelgen materıaldyq shyǵyn 17 paıyzǵa ósken. Al tilsiz jaýdyń saldarynan kóz jumǵandar kerisinshe, 12 paıyzǵa kemip, jaraqat alǵandar 20 paıyzǵa azaıdy.

«Sondaı-aq osy ýaqytta turǵyn úı sektorynda bolatyn órtter sanynyń tómendegenin atap ótken jón. Mysaly 2010 jyldyń 10 aıynda elde 10 myń 150 órt oqıǵasy bolsa, bıylǵy jyly bul kórsetkish 8 myń 323-ti qurap otyr. Aıtalyq, otty jaǵý kezindegi salaqtyq tanytýdyń saldarynan baqytsyz jaǵdaıǵa ushyraý jaǵdaılary 44 paıyzdy, elektr qurylǵylarymen jumys kezinde jiberilgen kemshilikterdiń saldarynan bolǵan órt 18 paıyzdy qurap otyr. Sondaı-aq peshterdi ornatý jáne paıdalaný kezinde qaýipsizdik erejesin buzý 10 paıyzdan asady. Turǵyn úı sektoryndaǵy órt kezinde adamdardyń qaza bolýynyń sebepteri negizinen ot jaǵý kezindegi uqypsyzdyqpen baılanysty»,-deıdi L.Shaposhnıkova.

Onyń sózine qaraǵanda, órt oqıǵalarynyń sany, ásirese, qys mezgili jaqyndaǵanda arta túsedi. «Respýblıka halqynyń 60 paıyzy qys mezgilinde jylytý peshin qoldanatynyn eskersek, peshterdi ornatqanda jáne paıdalaný kezinde órt qaýipsizdigi erejelerin saqtamaıtyn kóptegen azamattar óz úıleri men týǵandarynyń ómirine úlken qater tóndiredi»,-deıdi baspasóz qyzmetiniń ókili.