Bıylǵy jyldyń 1-toqsanynda bıletsiz 120-ǵa jýyq jolaýshy tasymaldanǵan
NUR-SULTAN. QazAqparat - 2020 jyldyń 1-toqsanynda poıyzdarda bıletsiz jolaýshy tasymaldaýdyń 120-ǵa jýyq faktisi anyqtaldy. Bul týraly «Adal jol» jobalyq keńseniń basshysy Islambek Maıshekın aıtty, dep habarlaıdy QazAqparat tilshisi.
«Osy jyldyń 1 toqsanynda 170 reıd júrgizilip, onyń barysynda bıletsiz jolaýshy tasymaldaýdyń 120-ǵa jýyq faktisi anyqtalǵan bolatyn. Anyqtalǵan faktiler boıynsha poıyz qyzmetkerleriniń ústinen tıisti ákimshilik hattama toltyryldy. Eger ótken jyldyń osyndaı kezeńimen salystyrar bolsaq, faktilerdiń sany eki esege qysqaryp otyr. Degenmen, úsh aıdyń ishinde 120 faktiniń anyqtalýy problemanyń áli qalǵandyǵyn kórsetedi», - dedi jobalyq keńse jetekshisi.
Onyń atap ótýinshe, ótken jyly bılet satýdyń jańa baǵdarlamasy iske qosylyp, jolaýshylar tasymalyna qatysty normatıvtik-quqyqtyq aktilerge, Ákimshilik quqyq buzýshylyq týraly kodekske ózgerister engizildi. Nátıjesinde bıletterdi jappaı satyp alý 60 paıyzǵa tómendep otyr.
Buǵan deıin «Adal jol» jobalyq keńseniń basshysy Islambek Maıshekın jolaýshylardy poıyzǵa otyrǵyzý kezinde bıometrııalyq sáıkestendirý jobasy qashan iske qosylatyndyǵyn aıtyp bergenin habarlaǵan edik.
