Bıylǵy Joldaýdyń ereksheligi - eldi modernızatsııalaý jolyndaǵy birqatar naqty máseleni sheshýge basymdyq jasalǵandyǵynda
ALMATY. 8 aqpan. QazAqparat /Názıra Eleýhan/- QR Prezıdentiniń Qazaqstan halqyna Joldaýy taıaýdaǵy memleket is-áreketteriniń negizgi baǵyttaryn belgileıtin strategııalyq qujat bolyp tabylady.
Bıylǵy baǵdarlamalyq qujattyń negizgi ereksheligi - eldi modernızatsııalaý jolyndaǵy birqatar naqty máseleni sheshýge basymdyq jasalǵandyǵynda. Bul, óz kezeginde, táýelsiz Qazaqstan damýynyń sapalyq turǵydan jańa satysynyń bastalýyna baılanysty. Bul týraly búgin Almatyda «Qazaqstan Respýblıkasynyń Prezıdenti N.Á.Nazarbaevtyń «Bolashaqtyń irgesin birge qalaımyz!» Joldaýy taqyrybynda ótken dóńgelek ústel barysynda aıtyldy.
Qazaqstan Respýblıkasy Prezıdentiniń janyndaǵy Qazaqstan strategııalyq zertteýler ınstıtýty dırektorynyń orynbasary, professor Zarema Shaýkenovanyń aıtýynsha, Joldaýda memleket ómiriniń barlyq salalary jan-jaqty qamtylyp, júzege asyrylatyn naqty mindetter anyqtalǵan, egjeı-tegjeıli josparlar usynylǵan, jetildirý sharalaryna erekshe mán berilgen, sonymen qatar bıyl da ıdeologııa suraqtary mańyzdy oryn alǵan. "Keıbir sarapshylar Joldaýdyń tereńdigine mán bermeı, baǵalylyǵyn túsinbeı ony saılaý aldy naýqan, ne jetistikterdiń esebi dep artyq aıtýda. Shyn máninde Elbasy bizge, halyqqa ult jumyla kirisýi kerek, eń bastysy - ishki mehanızmderdi qabilet pen qarymdylyqty, básekelestikti, ulttyq kúshti damytýy kerek degen naqty sıgnaldardy berdi",-dep atap ótti.
Ol sonymen qatar: "Bıyl táýelsizdiktiń 20 jyldyǵy basty mańyzdy oqıǵa retinde atalyp otyrǵandyǵy teginnen tegin emes, ol barlyq qazaqstandyqtardy bolashaq úshin, eldiń gúldenýi úshin birigýge shaqyrady",-dedi. Onyń pikirinshe, Elbasy saıası júıeni myqty mehanızm retinde jumys isteý úshin jańa satyǵa, jańa deńgeıge kóterýde.
Ǵylymı forýmǵa QR memlekettik organdarynyń ókilderi, sondaı-aq, Qazaqstannyń memlekettik jáne táýelsiz ǵylymı-taldaý qurylymdarynyń jetekshi sarapshylary, Almaty qalasynyń joǵarǵy oqý oryndarynyń oqytýshylary qatysty.
