Bıylǵy jazda Atyraýda 533 balany qamtyǵan 33 shatyrlyq, sporttyq lagerler uıymdastyryldy
ATYRAÝ. QazAqparat - Bıylǵy jazǵy demalystyń bir ereksheligi - 533 balany qamtyǵan 33 shatyrlyq, sporttyq lagerler qyzmetiniń uıymdastyrylýy boldy. Osyǵan oraı, Besikti eldi mekeninde ornalasqan «Tulpar» demalys kesheninde áskerı-patrıottyq klýbtardyń sharasy ótti, dep habarlady «Atyraý» gazeti.
Shatyrlyq lager jobasynyń basty maqsaty - patrıottyq tárbıe berý, alǵashqy áskerı daıyndyq bilimderin jetildirý jáne balalardyń bos ýaqytyn tıimdi paıdalaný edi. Búginde oblys mektepterinde 144 áskerı-patrıottyq ujym jumys jasaıdy. Onda 3847 oqýshy qamtylǵan. Sonymen qatar, 24 kolledj janynda da osyndaı klýbtar josparly jumystaryn júrgizýde.
- Jyl saıyn Bilim jáne ǵylym mınıstrligi tarapynan ótkiziletin «Alaý» áskerı-patrıottyq klýbtardyń sharasyna oqýshylar belsene qatysady. Sondaı-aq, sońǵy eki jylda Qorǵanys mınıstrligi uıymdastyrǵan áskerı-patrıottyq forýmda byltyr «Beıbarys», ústimizdegi jyly «Mahambet» klýbtary jaqsy daıyndyqtaryn kórsetti. Osyndaı jumystar óz nátıjesin berip keledi, - deıdi oblystyq bilim berý basqarmasynyń bólim basshysy Almagúl Qaıyrlıeva. Shatyrlyq lagerge 25 oqýshy qatysýda. Onyń baǵdarlamasyna sáıkes saptyq daıyndyq, nysanany dáldep atý, alǵashqy medıtsınalyq kómek kórsetý, sporttyq baǵdarlaý, áskerı ánder baıqaýy tárizdi sharalar uıymdastyryldy.
