Bıylǵy jazda Almatyda qýraǵan tórt myń aǵash kesiledi
ALMATY. 1 maýsym. QazAqparat /Erbol Azanbek/ -Almatyda jaz boıy 4 myńnan astam qýraǵan aǵash kesiledi. Bul týraly qalalyq tabıǵı resýrstar jáne tabıǵatty paıdalaný basqarmasynan habarlady.
Basqarma ókilderiniń aıtýynsha, qala boıynsha shirigen aǵashtyń sany 40 myńǵa jetken. Qazirgi kezde kún saıyn olardyń 200-300-i sanıtarlyq óńdeýden ótkizilýde. Olardy óńdeý, kesý naýqany qyrkúıektiń sońyna deıin júrgizilmek. Bul úshin qala qazynasynan 200 mln. teńge bólingen.
«Qazirgi kezde qalada 1 mln. 400 myń aǵash bar. Bulardyń shirip, qulaǵaly turǵan 4 myńy bıyl kesiledi. Olardyń ornyna kógaldandyrý mekemesi úıeńki, emen, shaǵan syndy japyraq tuqymdas jáne qylqan japyraqty 27 myń túp aǵash otyrǵyzady. Qulaǵaly turǵan aǵashtar adamdar ómiri úshin óte qaýipti. Kópshiligi jap-jasyl bolyp kóringenimen, ishteri qýys. Kez-kelgen sátte qulap ketýi yqtımal. Sondyqtan kesý jumystary qolǵa alyndy»,- deıdi qalalyq tabıǵı resýrstar jáne tabıǵatty paıdalaný basqarmasy bastyǵynyń orynbasary Eldar Keldibaev. Onyń aıtýynsha, qalǵan aǵashtar jyl saıyn kesilip, aýystyrylyp otyrylady.
