Bıylǵy jartyjyldyqta memleket bıýdjetine 7,15 trln teńge salyq túsken

NUR-SULTAN. QazAqparat – Bıylǵy jartyjyldyqta memleket bıýdjetine 7,15 trln. teńge salyq túsip, jospar 106,4%-ke oryndaldy. Bul týraly Memlekettik kirister komıtetiniń bıylǵy birinshi jartyjyldyqtyń qorytyndysy boıynsha ótken alqa májilisinen málim boldy, dep habarlaıdy QazAqparat.

QR Qarjy mınıstrliginiń Memlekettik kirister komıteti baspasóz qyzmetiniń derekterine qaraǵanda, ótken jyldyń sáıkes kezeńimen salystyrǵanda, memlekettik bıýdjetke salyqtyq túsimder 2,3 trln. teńgege kóbeıip, 1,5 esege ósken.

Atalǵan kezeńde bıýdjetke 567,2 mlrd. teńge somasyndaǵy qosymsha rezerv túsimderi qamtamasyz etildi. Kameraldyq baqylaý men salyq aýdıtiniń tıimdiligi 162,7 mlrd. teńgege ósken.

2022 jyldyń 1 jartyjyldyǵynda memlekettik kirister organdary salyq jáne keden baǵytynda 9,9 mln. memlekettik qyzmet kórsetip, onyń ishinde 99%-i elektrondy túrde kórsetilgen. Ótken jyldyń sáıkes kezeńimen salystyrǵanda elektrondy qymetter sany 1,9%-ke ósken. Odan bólek, memlekettik kirister organdarynyń Baılanys ortalyǵyna keńes alý úshin habarlasqan azamattardyń 97%-i operatorlardyń jumysyna oń baǵa bergen.

Alqa májilisiniń qorytyndysymen aýmaqtyq departamentterge sybaılas jemqorlyqpen kúres, bıýdjetke salyqtyq jáne kedendik túsimder josparynyń oryndalýy, sondaı-aq qosymsha rezervter túsimin qamtamasyz etý boıynsha jumysty jalǵastyrýǵa tapsyrma berildi.

Aıta keteıik, májilis beınekonferentsııa rejıminde ótip, oǵan Qarjy vıtse-mınıstri Erjan Birjanov tóraǵalyq etken. Jıynǵa aýmaqtyq memlekettik kirister departamentteriniń basshylary qatysty.