Bıylǵy jartyjyldyqta bıýdjetke 4 trıllıon teńge salyq tústi

NUR-SULTAN. QazAqparat - Bıylǵy jarty jylda memlekettik bıýdjetke 4 trıllıon teńge salyq tústi, dep habarlaıdy QazAqparat memleketitk kirister komıtetiniń baspasóz qyzmetine silteme jasap.

Bıýdjet kirisi boıynsha jospar birinshi jartyjyldyqta oıdaǵydaı júzege asyrylǵan. Memlekettik bıýdjet jospary - 102,6%, respýblıkalyq bıýdjet - 101% jáne jergilikti bıýdjetter - 107,5% oryndaldy.

Bul týraly búgingi Memlekettik kirister komıtetiniń basshysy Marat Sultanǵazıevtiń tóraǵalyǵymen ótken alqa otyrysynda belgili boldy. Alqa jumysyna aýmaqtyq memlekettik kirister departamentteriniń basshylary, QR QM MKK ortalyq apparatynyń basshylyq quramy men qyzmetkerleri qatysty.

Memlekettik bıýdjettiń 4 126,0 mlrd teńge dep eseptelgen jospar 108 mlrd teńgege asyra oryndalyp, naqty 4 234 mlrd teńge tústi, onyń ishinde:

- respýblıkalyq bıýdjetke josparlanǵan 3 094 mlrd teńge bolsa, 31 mlrd teńgege asyra oryndala otyryp, 3 124 mlrd teńge tústi;

- jergilikti bıýdjetke 1 032 mlrd teńge josparmen 1 109 mlrd teńge tústi, 77 mlrd teńgege asyra oryndaldy.

Sonymen qatar, salyqtyq jáne kedendik ákimshilendirý esebinen bıýdjetke salyqtar men kedendik tólemderdiń qosymsha túsimderi boıynsha jospar 162% oryndaldy.

Jospar boıynsha - 213,5 mlrd teńge, naqty túsim - 345,8 mlrd teńge.

Jartyjyldyq jospardy oryndaý boıynsha eń jaqsy kórsetkishterge Atyraý (106,7%), Aqtóbe (105,6%) jáne Mańǵystaý (104,9%) oblystarynyń memlekettik kirister departamentteri qol jetkizdi.

Birinshi jartyjyldyqta salyqtyq baqylaýdy júzege asyrý kezinde táýekelderdi basqarý júıesin qoldaný tıimdiligi ótken jyldyń uqsas kezeńimen salystyrǵanda 19,2 paıyzǵa artqanyn atap ótý qajet. Kedendik tekserýlerdiń tıimdiligi ótken jyldyń uqsas kezeńimen salystyrǵanda 3,5 esege artty.