Bıylǵy jarty jylda qazaqstandyqtarǵa unaǵan kólikter
ASTANA. QazAqparat - 2018 jyldyń birinshi jartyjyldyǵynda Qazaqstan aýmaǵynda 14 660 avtokólik shyǵaryldy. Olardyń arasynda jeńil jáne júk kólikteri, avtobýs tehnıkasy, arnaıy mashınalar bar. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«Esepti kezeńde Qazaqstanda shyǵarylǵan kólikterdiń jalpy quny 88,3 mlrd teńgege baǵalanyp otyr. Jalpy, jeńil avtomobılderdi óndirý 76,4 paıyzǵa ósip, 13 725-ke jetti. Onyń ishinde 8 573-i «AZIıA AVTO» AQ-ǵa, al 5 152-si «SaryarqaAvtoProm» JShS-ǵa tıesili», - delingen taratylǵan málimette.
Bıylǵy 6 aıdyń qorytyndysy boıynsha avtobýs tehnıkasyn shyǵarý eki esege qysqarsa, júk kólikterin óndirý byltyrǵy deńgeıde saqtaldy.
Jarty jylda otandyq avtozaýyttar ótkizgen kólikter 12 851-ge jetip, bul kórsetkish byltyrǵy deńgeıden 66,3 paıyzǵa artyq boldy.
Belgili bolǵandaı, jergilikti óndiristiń avtokólikterin satyp alýǵa el turǵyndary 71,3 mlrd teńge jumsady. Bul óz kezeginde bir jyl burynǵy kórsetkishten 38 paıyzǵa joǵary.
Birinshi jartyjyldyqta Qazaqstanda qurastyrylǵan jeńil kólikterdiń arasynda suranysqa ıe brendterdiń bestigine Lada (5 703 kólik), Hyundai (3 206), KIA (1 248), JAC (642) jáne Ravon (537) endi. Otandyq kásiporyndar usynatyn markalardyń tiziminde Chevrolet (463), Skoda (221), Peugeot (104), SsangYong (7 ) bar ekenin atap ótken jón.
Atalǵanı merzimde 2 269 avtomobıldi jeńildikti avtonesıeleý membaǵdarlamasynyń qatysýshylary satyp aldy.
