Bıylǵy jańa oqý jylynan bastap «Bala-aman» atty jańa baǵdarlama iske asyrylady
Balalardy saýyqtyrý sharalary mektepten bastalýy tıis ekenine toqtalǵan mınıstr, búginde qoǵamdyq ınstıtýttarmen birlese «Bala-aman» atty jańa baǵdarlama ázirlengenin atap ótti. Osy rette bastaýysh synyp oqýshylary arasynda sharshaǵandyqty tómendetý úshin ártúrli jattyǵýlardy kórsetýdi; naqty mysaldar arqyly durys músin qalyptastyrýǵa; durys tamaqtaný daǵdylaryna; balalardy medıtsınalyq alǵashqy kómek kórsetýge úıretýdi qarastyratyn veb-resýrstyń jumysy eskerilip otyr.
«Atap aıtqanda, baǵdarlama QR Bilim jáne ǵylym mınıstrligimen birge aǵymdaǵy jyly bastalmaq. Ol qanatqaqty tártipte 2016 jylǵy qyrkúıek aıynan bastap jeltoqsan aıyna deıin Astana jáne Almaty qalalarynyń mektepterinde, al 2017 jyldyń 1 qańtarynan elimizdiń barlyq mektepterinde iske asyrylady»,-dedi ol.
T. Dúısenovanyń sózine qaraǵanda, qańtar-naýryz aılarynyń aralyǵynda profılaktıkalyq tekserýmen 2,6 mln oqýshy nemese oqýshylardyń jalpy sanynyń 97,9 paıyzy qamtyldy. Aýrýdyń alǵash ret anyqtalýyna baılanysty dıspanserlik esepke 306 myń oqýshy tirkeldi.
Budan buryn habarlanǵandaı, balalar arasyndaǵy aýrýlardyń aldyn alý maqsatynda mekteptegi medıtsına bilim berý júıesinen densaýlyq saqtaý júıesine beriletin bolady. Tıisti zań jobasy ázirlendi. Jyl basynan bastap qanatqaqty tártipte júzege asyrylyp kele jatqan saýyqtyrý sharalarynyń kúntizbesi balalardy jyl boıy saýyqtyrýdy qarastyrady