Bıylǵy tórt aıda 10 myńǵa jýyq atyraýlyq Grýzııaǵa saıahattaǵan

ATYRAÝ. QazAqparat – Bıylǵy 4 aıda 10 myńǵa jýyq atyraýlyq Grýzııaǵa saıahattaǵan, dep habarlaıdy QazAqparat tilshisi.

Atyraý men Grýzııadaǵy Borjomı shahary baýyrlas qalalar atanýy múmkin.

Bul másele Atyraý oblysynyń ákimi Serik Shápkenov pen Borjomı qalasynyń meri Otar Arbolıshvılı kezdesýinde talqylandy.

«Munaıly óńirde Grýzııa Respýblıkasy kapıtalynyń qatysýymen 16 kásiporyn tirkelgen. Grýzııamen syrtqy saýda aınalymy bıylǵy qańtar-mamyrda 396,9 myń AQSh dollaryn qurap otyr. Atyraý qalasynan Kýtaısı baǵytyna aptasyna 3 áýe reısi qatynaıdy. Byltyr Atyraý oblysynan Grýzııaǵa demalý úshin 18 myńnan astam týrıst barǵan. Onyń 6 myńǵa jýyǵy «Borjomi Palace» sanatorııinde em alǵan. Al, bıylǵy 4 aıda 10 myńǵa jýyq atyraýlyq saıahattaǵan. Qazir óńirdegi týragenttikter men týroperatorlar grýzındik áriptesterimen belsendi baılanys ornatyp otyr»,-dedi Serik Shápkenov.

Kezdesýde taraptar Atyraý men Borjomı qalalary arasyndaǵy saýda-ekonomıkalyq, ınvestıtsııalyq yntymaqtastyqtyń, týrızm salasynyń ózekti máselelerin qozǵady.

Borjomı qalasynyń meri Otar Arbolıshvılı ózara baılanys ornatýdyń mańyzyna toqtaldy.

«Atyraý qalasymen baýyrlastyq qarym-qatynas ornatqymyz keledi. Osy maqsattaǵy memorandýmǵa qol qoıý úshin Borjomı qalasyna shaqyramyn», -dedi Otar Arbolıshvılı.

Eske sala ketelik, budan buryn Atyraý oblysy men Reseı arasyndaǵy saýda aınalymy 30 mln AQSh dollaryna jýyqtaǵanyn habarlaǵan bolatynbyz.