Bıylǵy topyraq tósenishindegi alǵashqy match ońaıǵa túsken joq – Elena Rybakına

ASTANA. QazAqparat – Bıylǵy topyraq tósenishindegi alǵashqy match ońaıǵa túsken joq. Bul týraly Bıllı Djın Kıng kýboginiń irikteý kezeńi aıasynda ótip jatqan Qazaqstan – Polsha matchy barysynda Elena Rybakına málim etti, dep habarlaıdy QazAqparat tilshisi.

Polsha ókili Veronıka Falkovskany jeńgennen keıin E.Rybakına baspasóz máslıhatynda suraqtarǵa jaýap berdi.

-Búgingi qarsylasyńyz qalaı boldy?

-Men ony buryn bilmeıtin edim. Sondyqtan onymen oınaý ońaıǵa túsken joq. Qarsylasym óner kórsetken matchtar az edi. Degenmen bapkerimmen birge daıyndaldym. Men reıtıngide joǵary turǵandyqtan, ol eshteńe joǵaltpaıtyn edi. Buryn men de onyń ornynda boldym. Sol sebepti ol óziniń sporttyq jolynda úzdik matchtarynyń birin ótkizdi dep oılaımyn.

-Oıyn kezinde qandaı qıyndyqtar boldy?

-Bul 2023 jylǵy topyraq tósenishindegi alǵashqy básekem bolǵandyqtan, qıynǵa tústi. Bálkim, dop berýim de oıdaǵydaı bolǵan joq. Hardqa úırenip qalǵandyqtan, topyraq tósenishindegi kortqa beıimdelý qapelimde qıyn. Degenmen birte-birte óz babyma kelemin dep úmittenemin.

-Jeńiske jetken jaǵdaıda óz komandańyzben birge bıleımin degen keshegi bergen ýádeńizdi oryndaısyz ba?

-Men ondaı ýáde bergen joqpyn (kúledi). Áńgime álem chempıonatyndaǵy jeńis týraly edi. Eger biz negizgi kezeńge ótip, onda jeńiske jetip jatsaq, árıne, nege bılemeske?

-Magda Lınetpen erteńgi kezdesý qalaı ótedi dep oılaısyz? Budan buryn onymen bir-aq ret oınadyńyz ǵoı.

-Magda ońaı shaǵylatyn jańǵaq emes, sondyqtan qıynǵa túsedi. Degenmen jeńis úshin barymdy salamyn.

Eske sala keteıik, budan buryn tennısten Qazaqstan – Polsha matchynyń jerebesi tartylǵanyn jazǵan edik.

Sondaı-aq Polshamen matchta ıÝlııa Pýtıntseva Qazaqstandy alǵa shyǵardy.

Qazaqstan – Polsha matchynda Elena Rybakına esepti 2:0-ge jetkizdi.