Bıylǵy tank bıatlonyna qatysatyn qazaqstandyq ekıpajdar belgili boldy

ASTANA. QazAqparat - Qurlyq áskerlerinde «Tank bıatlony-2016» aýqymdy halyqaralyq jarysynda Qazaqstannyń namysyn qorǵaıtyn tank ekıpajdary ataldy. Elimizdiń Qarýly kúshteri boıynsha úsh ekıpaj quramynda 10810 áskerı bóliminiń tankishileri óner kórsetedi, dep habarlaıdy QR Qorǵanys mınıstrliginiń baspasóz qyzmeti.

Bireýiniń quramynda «Astana», «Ońtústik» jáne «Batys» óńirlik qolbasshylyqtarynyń qurama komandasy. Bul qazaqstandyq armııanyń tórt úzdik tank ekıpajy. Olar áskerı bólimder, ári qaraı óńirlik qolbasshylyqtar men Qurlyq áskerleri deńgeıinde irikteýden ótti. Árqaısysynyń praktıkalyq tájirıbesi jáne kásibı bilimi men sheberliktiń qajetti deńgeıi bar.

Áskerılerdiń aıtýynsha, qazaqstandyq komandanyń jeńiske jetýge barlyq múmkindigi bar. Sebebi, «Tank bıatlonynyń» ótken saıystarynda tankishilerimiz únemi alǵashqy úshtikte boldy.

«Tank bıatlony-2016» shildeniń 30-y men tamyzdyń 13-i aralyǵynda Máskeý oblysynyń «Alabıno» polıgonynda ótedi. Oǵan qatysýǵa 17 el nıet bildirip otyr. Atap aıtqanda, Qazaqstan, Reseı, Qyrǵyzstan, Qytaı, Venesýela, Angola, Belarýs, Iran, Ázerbaıjan, Zımbabve, Armenııa, Mońǵolııa, Úndistan, Serbııa, Kýveıt, Nıkaragýa jáne Tájikstan.

Saıys baǵdarlamasy tankishilerge úsh kúrdeli kezeń daıyndap otyr. Eń aldymen jeke jarys. Oǵan barlyq komandalar qatysady. Ekinshi kezeńde estafeta.  Oǵan 12 komanda qatysady. Úshinshi kezeń - sońǵy estafeta. Munda jeńimaz ataǵy úshin 4 myqty komanda baq synasady.

Eske sala ketsek, tank ekıpajdarynyń jarysy Armııa halyqaralyq oıyndary-2016 sheńberinde ótedi. Bıylǵy armııa oıyndary Reseı men Qazaqstannyń shamamen 20 áskerı polıgonynyń aýmaǵyna ótkiziledi.

ArMI qatysýshylaryn osy jyly bizdiń elimiz alǵash ret qabyldaıdy. Qazaqstanda «Gvardeısk» oqý-jattyǵý polıgonynda armııa oıyndarynyń eki baıqaýy ótedi. Ol: «Artıllerııalyq atys sheberleri» jáne «Mergen shebi».