Bıylǵy talapkerlerge berilgen granttar ótken jylmen salystyrǵanda 1085 orynǵa artyq - Janseıit Túımebaev
ALMATY. Tamyzdyń 20-sy. QazAqparat /Erbol Turymbetov/ - Búgin Almatyda Bilim jáne ǵylym mınıstri Janseıit Túımebaevtyń qatysýymen bosaǵan bilim granttaryn berý jónindegi Respýblıkalyq konkýrstyq komıssııanyń májilisi bolyp ótti,
dep habarlaıdy QazAqparat.
Oǵan Bilim jáne ǵylym, Densaýlyq saqtaý mınıstrliginiń basshylary jáne joǵary oqý oryndarynyń rektorlary qatysty. Mınıstr konkýrs qorytyndysyn shyǵara kelip, stýdent jastardy qoldaý jóninde aıtarlyqtaı jumystar atqarylyp jatqanyn atap ótti.
«Emtıhan sessııalarynyń qorytyndysy boıynsha, jylyna eki ret bosaǵan bilim granttary beriledi. Ol aralyq attestatsııalaýdyń negizinde júrgiziledi. Bul rette stýdentterdiń áleýmettik jaǵdaılary eskeriledi. Bıylǵy talapkerlerge komıssııanyń sheshimimen 35 myńnan astam bilim granttary berildi. Bul ótken jylmen salystyrǵanda 1085 orynǵa artyq», dedi J. Túımebaev.
Bıyl bosaǵan granttardy taǵaıyndaý úshin 76 oqý ornynan 5547 bilim alýshy qujattaryn tapsyrǵan. Al konkýrstyq komıssııa jańa oqý jylyna 1670 bos bilim berý grantyn taǵaıyndaǵan.
Sonymen qatar, komıssııa sheshimimen soǵysqa qatysýshylar men soǵys múgedekterine teńestirilgen tulǵalar úshin kvotamen qabyldaý boıynsha qajettilikten tys qalǵan 82 jáne rezervtegi 50, barlyǵy 132 bilim berý granttary jetim balalarǵa(103) jáne Qyzylaǵashtan shyqqan 29 talapkerge berilgen.
