Bıylǵy «Shymkent City» jobasyna qatysty ınfraqurylymdyq jumystar aıaqtalady
ASTANA. QazAqparat - Shymkent megapolısine baılanysty kórsetkishter men ındıkatorlar áli de qarastyrylýda. Bul týraly búgin Ortalyq kommýnıkatsııalar qyzmetindegi baspasóz máslıhatynda Ońtústik Qazaqtan oblysynyń ákimi Janseıit Túımebaev málim etti, dep habarlaıdy QazAqparat.
«Shymkent qalasyn úshinshi iri megapolıske aınaldyrý - úlken másele. Álemdik deńgeıde megapolıske jatatyn qalalardyń arnaıy kórsetkishteri men ındıkatorlary bar ekenin bilesizder. Shymkent megapolısine baılanysty kórsetkishter men ındıkatorlar áli de qarastyrylýda. Mysaly, qaladaǵy jeke menshikke jatatyn jer úıler sany 217 myń bolsa (turǵyndardyń 60,7 paıyzy, 560 280 adam), kópqabatty turǵyn úı sany nebári - 2042 (turǵyndardyń 39,3 paıyzy, 362 720 adam)»,-dedi ákim. Osy oraıda «Shymkent City» jobasy júzege asyrylyp jatqanyna toqtalǵan Túımebaev, «osy 420 gektar jerdi qamtıtyn jobaǵa baılanysty barlyq negizgi ınfraqurylymdyq jumystar bıylǵy jyldyń aıaǵyna deıin aıaqtalady. Bolashaqta ol 70 myń halyq turatyn turǵyn aýdanǵa aınalmaq. Qaladaǵy eskirgen Qoshqar ata ózeniniń boıyndaǵy jáne eski qaladaǵy úılerdiń ornyna zamanaýı kópqabatty úıler salýǵa daıyndalýdamyz»,-dedi.
Onyń sózine qaraǵanda, oblystyq ákimdik tuńǵysh ret «Shatqaldar» baǵdarlamasyn qabyldap, josparlanǵan 16 qoǵamdyq demalys oryndarynyń beseýi boıynsha qurylys jumystary júrgizilýde. Astana úlgisimen qala mańynda jasyl beldeý qurý maqsatynda 5064 gektar jerge aǵash kóshetteri egildi. 2021 jylǵa deıin 20 myń gektarǵa deıin ulǵaıtý josparlanýda.
