Bıylǵy shomylý maýsymynda sýǵa bata jazdaǵan 328 adam qutqaryldy – QR TJM

NUR-SULTAN. QazAqparat – Bıylǵy jylǵy jaz mezgilindegi shomylý maýsymynda QR Tótenshe jaǵdaılar mınıstrliginiń qutqarýshylary 328 adamdy qutqardy, olardyń ishinde 61 bala bar, dep habarlaıdy QazAqparat mınıstrliktiń baspasóz qyzmetine silteme jasap.

Adamdardyń sýdaǵy qaýipsizdigin qamtamasyz etý maqsatynda TJM barlyq deńgeıdegi ortalyq jáne jergilikti atqarýshy organdarmen ózara is-qımyl jasaı otyryp, sýda tótenshe jaǵdaılardyń týyndaý qaýpin azaıtý boıynsha uıymdastyrýshylyq jáne praktıkalyq is-sharalar keshenin aldyn ala bastady jáne úzdiksiz ótkizdi.

Shomylýǵa ruqsat etilgen 538 oryn anyqtaldy, bul ótken jylmen salystyrǵanda 93 orynǵa kóp.

TJM jergilikti atqarýshy organdarmen jáne jekemenshik obektilermen birlesip, 454 qutqarý jáne 66 medıtsınalyq beket qurdy. Asa qaýipti ýchaskelerde 59 mobıldi qutqarý beketi qoıyldy.

Sý aıdyndarynda 6655 qaýipsizdik belgisi jáne 1656 aqparattyq stendter ornatyldy, onda adamdardyń qaza bolý sebepteri men oqıǵalarǵa yqpal etken jaǵdaılar jazylǵan.

Turǵyndar arasynda 1 mln 139 myń 935 dana úgit ónimi (býkletter, paraqshalar) taratyldy, halyqpen 5314 jıyn ótkizildi.

Jergilikti atqarýshy organdarmen ózara is-qımyl boıynsha 32085 bala júzýge úıretildi.

Aldyn alý jumystaryna 17943 volonter tartyldy.