Bıylǵy on aıda Qazaqstanda Jalpy ishki ónimniń ósimi 5,8 paıyzdy qurady - QR Statıstıka agenttigi
ASTANA. 14 qarasha. QazAqparat - Bıylǵy on aıdyń qorytyndysy boıynsha Jalpy ishki ónimniń ósimi 5,8 paıyzdy qurady. Bul týraly búgin Astanada ótken baspasóz máslıhatynda QR Statıstıka agenttiginiń basshysy Álıhan Smaıylov málim etti.
«Sonyń ishinde ónerkásip óndirisiniń kólemi 2,3 paıyzǵa ósti, aýyl sharýashylyǵy 6,6 paıyzǵa, kólik salasynda qyzmetterdiń kólemi 7,4 paıyzǵa joǵarylady, baılanys salasynda qyzmetterdiń deńgeıi 14,1 paıyzǵa ósti. Sondaı-aq saýda salasynda qyzmetter 12,6 paıyzǵa artty», - dedi agenttik basshysy.
Onyń sózine qaraǵanda, qyrkúıekte halyqtyń jan basyna shaqqandaǵy ataýly aqshalaı tabystary baǵalaý boıynsha 55 myń 292 teńgeni qurady. Bul kórsetkish byltyrǵy osy kezeńmen salystyrǵanda 7,7 paıyzǵa joǵary.
Munymen qosa, 2013 jylǵy qazanda qyzmetkerlerge eseptelgen ortasha aılyq ataýly jalaqy 105 948 teńgeni qurap, 2012 jylǵy qazanmen salystyrǵanda 7,2 paıyzǵa artty.
