Bıylǵy on aıda Qazaqstan-Grekııa saýda aınalymy 1,4 mlrd dollarǵa jetti

ASTANA. QazAqparat – Bıylǵy on aıda Qazaqstan men Grekııa arasyndaǵy taýar aınalymynyń kólemi 1,4 mlrd dollarǵa jetti. Bul týraly búgin elordada Grekııa Respýblıkasynyń Syrtqy ister mınıstri Nıkolas Dendıasty qabyldaǵan elimizdiń vıtse-premeri-Syrtqy ister mınıstri Muhtar Tileýberdi málim etti, dep habarlaıdy QazAqparat tilshisi.

«Grek Respýblıkasy – bizdiń Ońtústik Eýropadaǵy mańyzdy saıası jáne ekonomıkalyq áriptesterimizdiń biri. Bıyl biz dıplomatııalyq qatynastardyń ornaǵanyna 30 jyldyǵyn atap ótýdemiz. Mınıstr Nıkolas Dendıas myrza ekeýimiz ashyqtyq pen tolyq ózara túsinistik rýhynda saıası jáne saýda-ekonomıkalyq salalardaǵy ekijaqty qarym-qatynastyń bolashaǵyn, sondaı-aq halyqaralyq uıymdar aıasyndaǵy yntymaqtastyqty talqyladyq. Grekııa – elimizdiń saýda seriktesi. Máselen, bıylǵy 10 aıda Qazaqstan-Grekııa arasyndaǵy taýar aınalymy 1,4 mlrd AQSh dollaryn qurady. Bul ótken jylmen salystyrǵanda 28 paıyzǵa artyq», - dep toqtaldy Muhtar Tileýberdi.

Mınıstr keltirgen derekke sáıkes, Qazaqstanda 10 myń grek ultynyń ókilderi turady. Sonymen qatar Muhtar Tileýberdi elimizdiń 17 aımaǵynda grek dástúri men ádet-ǵurpyn qoldaıtyn «Fılııa» assotsıatsııasy jumys isteıtinin atap ótti.