Bıylǵy oqý jyly erekshe bolmaq - B. Jumaǵulov
ASTANA. 1 qyrkúıek. QazAqparat - Bıylǵy oqý jylynyń jańalyqtary kóp. Búgin Astanadaǵy №60 mektepte ótken saltanatty shara barysynda QR Bilim jáne ǵylym mınıstri Baqytjan Jumaǵulov osylaı aıtty.
«Aǵymdaǵy jylda myńdaǵan mektepterde bilim berýdiń elektrondy júıesi engiziledi. Osynyń arqasynda árbir qazaqstandyq oqýshy turǵylyqty jerine qaramastan, bilim alatyn bolady. Sondaı-aq bıyl birinshi synyptarda aǵylshyn tilin oqytý jumysy bastalady. Sender (oqýshylar - avt.) osy bastamanyń alǵashqy qarlyǵashtary bolasyńdar!», - dep atap kórsetti mınıstr.
Onyń habarlaýynsha, otandyq bilim berý salasyndaǵy búgingi reformalardyń basty maqsaty - sapaly bilimge kóshý. Ol úshin barlyq standarttar qaıta qaralyp, jańa oqytý baǵdarlamalary men oqýlyqtar daıarlanyp jatyr. Nazarbaev zııatkerlik mektepteriniń tájirıbesi respýblıka boıynsha taratylyp, bilim berý salasyn qarjylandyrýdyń jańa tetikteri engizilip keledi.
