Bıylǵy naýryzdan bastap benzın men bıtým taýar bırjalary arqyly ótkiziledi - Nurlan Noǵaev

NUR-SULTAN. QazAqparat – Bıylǵy naýryz aıynan bastap benzın men bıtýmdy taýar bırjalary arqyly ótkizý josparlanǵan. Bul týraly QR Energetıka mınıstrliginiń alqa májilisinde vedomstvo basshysy Nurlan Noǵaev málim etti, dep habarlaıdy QazAqparat tilshisi.

«Prezıdent Joldaýynyń aıasynda munaı ónimderi men elektr energııasy salasynda bırjalyq saýdany retke keltirý jáne jetildirý, sonda-aq básekeles saıasatty damytý boıynsha tapsyrma berilgen bolatyn. Máselen, bıylǵy naýryz aıynan bastap benzın men bıtýmdy taýar bırjalary arqyly ótkizý josparlanǵan, bul rette ótkizý kólemi «Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» QR Zańynyń aıasynda Mınıstrlik bekitetin aı saıynǵy jetkizý josparlaryna sáıkes anyqtalatyn bolady. Dızel otyny men kerosındi taýar bırjalary arqyly ótkizýdi 2021 jyldyń 3-shi toqsanynda bastaý josparlanýda», - dedi mınıstr.

Sonymen qatar, Memleket basshysynyń 2019 jylǵy 5 qyrkúıektegi «Qazaqstan Respýblıkasynyń munaı-gaz salasyn damytý máseleleri týraly» hattamalyq tapsyrmasynyń aıasynda bıylǵy jyly ónimdiligi jylyna 6 mln tonnaǵa deıin bolatyn «Keńqııaq-Atyraý» munaı qubyry reversiniń qurylysyn aıaqtaý josparlanyp otyr. Atalǵan jobany iske asyrý Pavlodar jáne Shymkent munaı óńdeý zaýyttaryn batys qazaqstandyq (Atyraý, Mańǵystaý oblystary) munaımen júkteýge múmkindik týǵyzyp, Qyzylorda oblysynyń munaı óndirýshi kompanııalary úshin ishki naryqqa munaı jetkizýdegi júktemeni tómendetedi, sondaı-aq ishki naryq pen eksporttyq jetkizilimder arasyndaǵy teńgerimsizdikti joıady.