Bıylǵy Naýryz astanalyqtarǵa ǵajaıyp jaryq shashý syılamaq
ASTANA. 17 naýryz. QazAqparat - AQSh, Belgııa jáne basqa da memleketterdiń kórermenderin tańqaldyrǵan biregeı jaryq shashý shoýy Naýryz meıramy merekesi qarsańynda Astanada kórsetiletin bolady. Tórt belgııalyq sýretshi ony ǵajaıyp álemge biriktirip, OVO - mýltısensorlyq kórkem ınstallıatsııany dúnıege ákelgen. Osyny elorda turǵyndary 2013 jyldyń 20 naýryzy kúni 21.00-de «Ǵashyqtar» alańynda kóre alady. Bul jaıynda elordanyń resmı saıtynan habarlandy.
Odebois kompanııasynyń músinshileri Mostafa Hadı men Pol Marchandıse o basta tereń qııaldap, «altyn qıma» negizinde monýmentaldy aǵash jumyrtqa jasady. ACT lightning design-ten jaryq berýshi sýretshi Kýrt Vermıýlen men stsenografshy Markos Vınals Bassols anımatsııalyq jáne dınamıkalyq jaryq túsirip, bul pishinge «jan bitirdi».
Belgııalyq sýretshilerdiń jumystaryndaǵy bir erekshelik beıneli dızaın ázirlegende jańa tásilderdi tájirıbeden ótkizip, qoldanystaǵy sáýletpen óte tıimdi ári keremet úılestire bilýinde. «Biz qazirgi kezde óte sırek kezdesetin materıaldardy, jańa úlgilerdi jáne tehnologııalardy tájirıbeden ótkizip jatyrmyz. Óz aramyzdaǵy daǵdylar úılesimdiligin nyǵaıta otyryp, kórkemdik tájirıbemizdi damytýǵa, óner týyndylary men sáýlet jobalaryn jasaý kezinde jańasha kózqaraspen qaraýǵa múmkindik beredi», - deıdi Kýrt Vermıýlen. Alaıda ol elordada qoıylatyn shoý jaıly egjeı-tegjeıli málimet bergisi kelmedi.
Tańǵajaıyp qoıylym óziniń ásemdigimen kórermenderdi tańqaldyrary sózsiz. Sańlaq dızaınerdiń shyǵarmashylyǵy, sáýlet jobalarynyń tabıǵaty men jańashyldyqtaryn qabyldaý sheberligi men qııaly naqty, shynaıy ári tehnıkalyq turǵydan biregeı týyndyny dúnıege ákelýge qabiletti.
Jaryq shashý shoýy - Naýryz Meıramyn toılaýǵa arnalǵan saltanatty is-sharalardyń bastamasy ǵana. Bıylǵy jyly Astananyń 15 jyldyǵy qarsańynda, Ulystyń uly kúni - Naýryz meıramyn toılaý úshin Astanaǵa respýblıkanyń barlyq óńirlerinen qonaqtar keledi. Kıiz úıler tigiledi. Qonaqtar qalada serýen quryp, tańǵajaıyp shoýlar men qoıylymdarǵa kýá bolady.
