Bıylǵy Medıa forýmda Qazaqstannyń EQYU-na tóraǵalyq etýiniń mán-mańyzy qaralady - Bas redaktor S.Sraıl
/strong>Naýryzdyń 16-sy. QazAqparat / Ádilet Musahaev / - Aldaǵy Eýrazııalyq Medıa forýmda qazirgi kezdegi ǵalamdyq qaýymdastyqty alańdatyp otyrǵan máseleler qaralady. Bul jaıynda «Jas qazaq» gazetiniń Bas redaktory Smaıl Sraıl búgingi ótken baspasóz máslıhatynda aıtty,
dep habarlaıdy QazAqparat.
Onyń aıtýynsha, «Qazaqstannyń EQYU-na tóraǵalyq etýiniń mán-mańyzy» taqyrybynyń kóterilýi Qazaqstan men Eýrazııa qurlyǵy úshin óte mańyzdy, sondyqtan bul taqyrypty aınalyp ótý múmkin emes. Sonymen qatar, «Iran ıadrolyq baǵdarlamasy boıynsha jumystyń jandanýy jáne nátıjesinde Tegeran men Batys arasyndaǵy saıası qarym-qatynastyń ushyǵýy» taqyryby da qaralmaq. Redaktordyń aıtýynsha, bul taqyryp budan burynǵy Medıa forýmdarda da kóterilgen. Bıylǵy shara barysynda Batys pen Shyǵystyń arasyndaǵy kelispeýshilikter, ekonmomıkalyq qana emes energetıkalyq, dinı máseleler qaralmaq.
Sondaı-aq ol «BAQ-tyń belgili oqıǵalar men qubylystarǵa syndarly ári jaýapkershilikpen ún qatýy» taqyryby da búgingi bolyp jatqan oqıǵalar men qubylystarǵa baılanysty kóterilip otyrǵandyǵyn jetkizdi. «Mysaly, Iranda ótken saılaýdan keıin biraz tolqýlardyń bolǵany belgili. Sol kezde bizdiń aqparat quraldarymyz batystyq basylymdarǵa súıenip aqparat berdi. Onda bılik jazyqsyz sherýge shyqqandardy basyp-janshyp otyr degen bolatyn. Al endi Iranǵa kórshiles elderdiń taratqan maǵlumatyna qarasaq, bul sherýdi Batystaǵy belgili bir uıymdardyń uıymdastyryp, qoldaý kórsetkeni aıtylady. Kóbinde yqpaldy toptar belgili kúshterdi qarjylandyryp, óz múddelerine paıdalanyp ketedi. Sondyqtan BAQ-tyń osyndaı oqıǵalardyń aq-qarasyn ajyratýyn kózdeımiz», deıdi S.Sraıl.
Sonymen qatar ol «Internet aýmaǵy jáne BAQ bostandyǵyn retteý» jáne «Saıası ımıdj máselesi» taqyryptary da bıylǵy konferentsııa jumysynda qaralatyndyǵyn aıtty.
