Bıylǵy qysta «Býrabaı Damý» nysandarynda 19 myńnan astam týrıst demaldy

KÓKShETAÝ. QazAqparat – Bıylǵy qysta QR Prezıdentiniń Іs Basqarmasyna qarasty «Býrabaı Damý» kásipornyna qarasty týrıstik nysandarda 19 myńnan astam týrıst demaldy, dep habarlaıdy QazAqparat.

Týrıster úshin tartymdy bolǵan nysandardyń kóshin «Burabay Land» otbasylyq oıyn-saýyq parki bastap tur. Arqanyń alty aı qysynda osy jerge kelip, Aıaz atanyń úıin kórip, buǵy, at pen ıt jegilgen shanaǵa minip, basqa da qyzyqqa kenelgen jurttyń qarasy qalyń boldy.

Al, tabıǵat aıasyndaǵy nysandardyń qatarynda Býrabaı kóli men Jumbaqtastyń mańaıynan adam aıaǵy úzilmedi. Oǵan muz qatqan aıdyn betinde túrli buqaralyq sporttyq sharalardyń jıi uıymdastyrylǵany da áser etti.

«Býrabaı Damý» nysandarynyń arasynda kóktem mezgilinde de barýǵa bolatyn jerler az emes. Mysaly, mýltımedıalyq ınteraktıvti keshen jyl on eki aı jumys isteıdi. Bul jerde «Samuryq qustyń samǵaýy» atty 5D attraktsıondy tamashalaýǵa bolady.

Sol sııaqty maral sharýashylyǵy da meımandardy qarsy alýǵa qashanda daıyn. Sharýashylyqqa kelgen týrıster kórkine kóz toımaıtyn ásem janýarlarǵa jem-shóp berip, sýretke túsedi. Pantokrınniń qalaı jasalatynyna kýá bolyp, basqa da qyzyqty sharalardy tamashalaıdy.

Jalpy, «Býrabaı Damý» mekemesi týrısterdiń qyzyqty ári jaıly ýaqyt ótkizýine barynsha jaǵdaı jasap otyr. Munda kelgen adamdar «Sapar ortalyǵy», «Abylaı han alańy», «Jaılaý» etnoaýyly, «Sholý alańy» syndy nysandarǵa barady. Sondaı-aq, «Han asýy», «Býrabaı – Qazaqstannyń injý-marjany», «Úkili Ybyraı soqpaǵy», «Alpınızm» syndy ekskýrsııalyq baǵyttarmen saıahattaıdy.