Bıylǵy qyrkúıekte bir qyzmetkerdiń ortasha aılyq ataýly jalaqysy 105 905 teńgeni qurady - QR Statıstıka agenttigi
ASTANA. 17 qazan. QazAqparat - 2013 jylǵy qyrkúıekte bir qyzmetkerdiń ortasha aılyq ataýly jalaqysy 105 905 teńgeni qurady. Ataýly jalaqy ındeksi 2012 jylǵy qyrkúıekke qaraǵanda 106,1 paıyzdy, al naqty jalaqy ındeksi 100,7 paıyzdy qurady. Bul týraly búgin QR Statıstıka agenttigenen habarlandy.
- Salalyq qurylymda eń úlken jalaqy ken óndirý ónerkásibi men karerlerdi qazýda - 207,3 myń teńge (ortasha respýblıkalyq deńgeıden 2,0 esege asady), kásibı, ǵylymı jáne tehnıkalyq qyzmette - 201,0 myń teńge (1,9 ese), sondaı-aq qarjy jáne saqtandyrý qyzmetinde - 177,4 myń teńge (1,7 ese) kóliminde belgilendi. Eń tómengi jalaqy bilim berýde belgilendi - 67,0 myń teńge, bul el boıynsha orta kórsetkishten 36,8 paıyzǵa tómen.
- Óńirlik bóliniste eń joǵarǵy jalaqy Atyraý oblysynda baıqaldy - 188,0 myń teńge, bul kórsetkish ortasha respýblıkalyq deńgeıden 1,8 esege asady. Jambyl oblysynda munyń shamasy 74,3 myń teńgeni qurady, bul el boıynsha ortasha deńgeıden 29,8 paıyzǵa tómen.
