Bıylǵy QR chempıonatynda álem jáne Olımpıada chempıondaryn kórýimiz múmkin
ASTANA. QazAqparat - Bokstan bıyl ótetin el birinshiligine sharshy alańda kórinbeı ketken maıtalman sportshylar qatysýy múmkin, dep habarlaıdy QazAqparat tilshisi.
Qazaqstan boks federatsııasynan málim etkendeı, bıylǵy el birinshiliginde kez kelgen boksshy baq synaı alatyndyǵyn málim etti. Jarysqa Gambýrgte ótken sońǵy álem chempıonatynda top jarǵan Qaırat Erálıev te qatyspaq. Boksshylar qazir demalystaryn aıaqtap, jattyǵý jumystaryn pysyqtap jatqany aıtylady.
Osy oraıda aıta keteıik, ótken jyly Rıo-de-Janeıro Olımpıadasynyń chempıony atanǵan Danııar Eleýsinov jaqynda ulttyq quramaǵa qaıta oralatyny týraly málim etken bolatyn. Demek, sońǵy Olımpıada oıyndarynan keıin kórinbeı ketken Eleýsinovti, kásipqoı boksta eki ret baǵyn synap kórgen Jánibek Álimhanulyn jáne Olımpıada oıyndarynyń eki dúrkin kúmis júldegeri atanǵan Ádilbek Nııazymbetovtardy el birinshiliginde qaıta kórýimiz múmkin.
Boksshylar úshin Qazaqstan chempıonatynda top jarý - qashan da mańyzdy. Sebebi, el birinshiliginde baqtary janǵan boksshylar Ulttyq quramaǵa qabyldanyp, eldiń ishi-syrtynda ótetin basty dodalarda óner kórsetý múmkindigine ıe bolady. Sondyqtan, elimizdiń Astana, Almaty qalalarynan bólek, 14 oblystan jınalatyn boksshylar el chempıony ataný úshin baryn salary anyq.
Aıta keteıik, bokstan Qazaqstan birinshiligi 5-12 qarasha kúnderi aralyǵynda Shymkentte ótedi.
