Bıylǵy kóktemgi egis jumystaryna janarmaı quny naryqtyq baǵadan 13 paıyzǵa tómen bolady

Bul jóninde búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Aýyl sharýashylyǵy mınıstri Asyljan Mamytbekov málim etti.

QR Aýyl sharýashylyǵy mınıstrligi oblystardyń ákimdikterimen aýyl sharýashylyǵy taýar óndirýshilerine kóktemgi egis jumystaryn júrgizýge dızel otynyna qajettilik shamamen 360 myń tonnany qurap otyrǵanyn anyqtaǵan eken.

Mınıstrdiń aıtýynsha, jeńildikti janarmaımen qamtamasyz etý máselesi sheshilýde. Aýyl sharýashylyǵy taýarlaryn óndirýshilerge dızel otynynyń baǵasy naryqtyq qunyna qaraǵanda tómen bolady. Ótken vedomstvoaralyq komıssııada janar-jaǵarmaıdy naryqtyq baǵaǵa qaraǵanda 13 paıyzǵa tómen deńgeıde jetkizý sheshimi jasalǵan.

QR Munaı jáne gaz mınıstrligimen munaı óńdeý zaýyttaryna bekitilgen oblystar tizimderiniń jobasy men kólemi kelisildi.