Bıylǵy kóktemgi egis naýqany maýsym aıynyń basynda aıaqtalady - Aıdarbek Saparov
«Memleket basshysy Qasym-Jomart Kemeluly Toqaev kóktemgi dala jumystaryn tolyq kólemde jáne ońtaıly merzimde júrgizý úshin jaǵdaı jasaýdy tapsyrdy. Atalǵan tapsyrmany oryndaý úshin barlyq sharalardy qabyldap, sharýalarmen únemi baılanysta jumys júrgizemiz. Bıyl aýyl sharýashylyǵy daqyldarynyń egis kólemi 22,8 mln gektar quraıdy. Osy jyly ákimdikterge áleýmettik mańyzy bar daqyldardyń, onyń ishinde kartop, qaraqumyq, qant qyzylshasy, maıly jáne jemshóp daqyldarynyń alqaptaryn keńeıtýge erekshe nazar aýdarý usynyldy», - dedi A. Saparov Ortalyq kommýnıkatsııalar qyzmetinde.
Onyń aıtýynsha, jalpy egis jumystary ońtaıly merzimde shtattyq rejımde ótýde. Sharýalar ylǵal jabý, kóktemgi jer jyrtý men óńdeý sııaqty mańyzdy tehnologııalyq operatsııalaryn ýaqtyly júrgizdi.
«Qazirgi ýaqytta kóktemgi dala jumystary respýblıkanyń barlyq óńirlerinde júrgizilýde. Atap aıtqanda, búgingi kúni jalpy egis alańynan 16,7 mln gektar nemese 88,5 paıyzy egildi, bul ótken jyldan 1,5 mln gektarǵa artyq. Sonyń ishinde: dándi daqyldar - 13,1 mln ga nemese 87,2%, maıly daqyldar 2,7 mln ga nemese 93,6%. 1 mln gektar basqa da daqyldar sebildi», - dedi birinshi vıtse-mınıstr.
Negizgi astyq egetin oblystar mamyr aıynyń ortasynan bastap egýge kiristi. Bul rette Aqtóbe, Mańǵystaý jáne Jambyl oblystarynda egis jumystary aıaqtaldy. Almaty, Túrkistan jáne Qyzylorda oblystarynda aıaqtalý satysynda.
«Jalpy, oblys ákimdikteriniń derekteri boıynsha bıyldyń egis naýqanyn 3 maýsymǵa deıin aıaqtaý josparlanyp otyr», - dedi Aıdarbek Saparov.