Bıylǵy kóktemde 6 myńnan astam jas áskerge shaqyrylady
Qazaqstan Respýblıkasy Qarýly kúshteriniń áskerı bólimderine jiberý úshin qalalar men oblystardyń qorǵanys isteri jónindegi departamentteri men basqarmalary áskerge shaqyrylýshylar komandalaryn jasaqtaýǵa kiristi. 2022 jylǵy kóktemgi áskerge shaqyrý naýqanynda Qazaqstan áskerine 6 000-nan astam jasóspirimdi shaqyrý josparlanyp otyr.
Alǵashqy komandalardyń biri Túrkistan oblysynan Gvardeısk garnızonyndaǵy Qurlyq áskerleriniń oqý-jattyǵý ortalyǵyna jiberildi.
– Armııa – jas jigittiń ómirindegi mańyzdy kezeń. Ár er azamat el basyna kún týǵanda óz otbasyn, Otanyn qorǵaýǵa daıyn bolýy kerek. Jaqyndaryn qorǵaı bilýi kerek. Aldaǵy áskerdegi qyzmet Otan qorǵaýǵa úıretedi. Erteńgi azamattyq salaǵa da qajetti áskerı-eseptik mamandyqtar ala alasyz, – dedi áskerge shaqyrylýshylardy shyǵaryp salý saltanatynda qorǵanys isteri jónindegi departament bastyǵy polkovnık Nurmahanbet Dúısebaev.
Kóktemgi áskerge shaqyrý naýqany 30 maýsymǵa deıin jalǵasatynyn aıta ketken jón.
Osy ýaqyt ishinde 17 000-nan astam qazaqstandyq Memlekettik kúzet qyzmetine, QR UQK Shekara qyzmetine, Qarýly kúshterdiń áskerı bólimderine, Tótenshe jaǵdaılar mınıstrligi men Qazaqstan Respýblıkasy Ulttyq ulanynyń bólimshelerine shaqyrylatyn bolady.
