Bıylǵy «Qazaqstan Barysy» týrnıriniń aqtyq syny 5 shildede elordadaǵy «Saryarqa» velotreginde ótedi - Arman Shoraev
ASTANA. QazAqparat - QR Prezıdentiniń júldesi úshin «Qazaqstan Barysy» týrnıriniń aqtyq syny 5 shildede elordadaǵy «Saryarqa» respýblıkalyq velotreginde ótedi. Bul týraly búgin ótken baspasóz máslıhatynda QR Qazaq kúresi fedaratsııasynyń prezıdenti Arman Shoraev málim etti.
«Osy úlken dodany besinshi márte ótkizgeli jatyrmyz. Búginde «Qazaqstan Barysy joǵary deńgeıge jetip otyr. Jobanyń arqasynda úzdik balýandar búkil elge tanymal azamattar retinde tanyldy. Bul turǵyda olar jastar men búldirshinderge úlgi jáne elimizde sportty nasıhattaýǵa aıtýly úles qosýda», - dedi Shoraev.
Atap aıtqanda, atalǵan týrnır aıasyndaǵy irikteý tórt kezeńde ótedi. Birinshi kezeńdegi irikteýler aǵymdaǵy sáýir boıy aýyldar men eldi mekenderde, ІІ kezeń - aýdandy, qalalyq 1-15 mamyr aralyǵynda, III kezeń - oblystyq irikteýler 20 mamyrǵa deıin, sondaı-aq sońǵy kezeń aqtyq syn. Aqtyq saıysqa qatysatyn balýandar arasynda 19-23 mamyr aralyǵynda Almaty qalasynda oqý-jattyǵý jıyny ótkiziledi.
Aýyldyq, aýdandyq, qalalyq jáne oblystyq jarystar men týrnırdiń aqtyq syny 18 jastan joǵary eresekter arasynda +80 keli, ıaǵnı absolıýttik salmaq dárejesi boıynsha ótkiziledi. Dástúr boıynsha fınalǵa irikteý kezeńderinen ótken 32 balýanmen qatar byltyrǵy jylǵy «Qazaqstan Barysy» respýblıkalyq týrnıriniń jeńimpazy Muhıt Tursynov ta qatysady.
